ऊर्जा खबर
काठमाडौँ । असोज ११ र १२ गते अविरल वर्षापछि आएको बाढी पहिरो तथा डुबानका कारण २२४ जनाको मृत्यु भएको प्रारम्भिक तथ्याङ्क सरकारले सार्वजनिक गरेको छ । प्रधानमन्त्री केपी शर्मा ओलीले मंगलबार आयोजना गरेको पत्रकार सम्मेलनमा सरकारका मुख्य सचिव एकनारायण अर्यालले यस्तो तथ्याङ्क सार्वजनिक गरेका हुन् । प्रारम्भिक तथ्याङ्क अनुसार विपत्तमा परी २४ जना अझै बेपत्ता रहेको र १५८ जना घाइते भएका छन् ।
त्यस्तै, ऊर्जा तथा सिँचाई क्षेत्रका पूर्वाधारमा करिब ५ अर्बसहित कुल १७ अर्ब भन्दा बढीको संरचनामा क्षति पुगेको प्रारम्भिक अनुमान छ । सरकारको अनुसमान अनुसार सञ्चालनमा रहेका ६६७ मेगावाटका १६ जलविद्युत् केन्द्र तथा ११३९ मेगावाटका निर्माणधीन १८ जलविद्युत् आयोजना र ५ वटा प्रमुख प्रसारण लाइनको टावरमा क्षति हुँदा करिब ४ अर्ब रुपैयाँ बराबरको क्षति भएको छ । प्रसारण लाइनमा क्षति पुगी विद्युत् अवरुद्ध भएका ठाउँहरूमा वैकल्पिम व्यवस्था गरी लाइन सुचारु गर्ने वातावरण मिलाउने सरकारको धारणा छ । सिँचाई पूर्वाधारतर्फ १ अर्ब बराबरको क्षति भएको छ । त्यस्तै, खानेपानी पूर्वाधारतर्फ ३ अर्ब ५५ करोड रुपैयाँ क्षति भएको छ ।
बाढीपहिरोका कारण ७७ मध्ये २१ जिल्ला बढी प्रभावित भएका छन् । ती मध्ये काठमाडौँ उपत्यकासहित काभ्रेपलाञ्चोक, सिन्धुली, सिन्धुपाल्चोक र मकवानपुरमा बढी क्षति भएको छ ।
बाढी र पहिरोका कारण सडक र पुलतर्फ २ अर्ब ५२ करोड र कृषि तथा पशुपक्षीतर्फ ६ अर्ब रुपैयाँ क्षति भएको छ । खोज तथा उद्दार कार्य २ दिनभित्र सक्ने र राहतलाई एकद्वार प्रणालीमार्फत वितरण गर्ने समेत सरकारले जानकारी दिएको छ ।
त्यस्तै घरबारविहीन भएकाहरूलाई सरकारले तोकेको स्थानमा अस्थायी आवास बनाउन दिइने र मृतकको परिवारलाई जनही २ लाख रुपैयाँ दिने समेत मुख्य सचिव अर्यालले जानकारी दिए ।
