ऊर्जा खबर
काठमाडौं । नेपाल विद्युत प्राधिकरण विरगन्ज वितरण केन्द्रले ढेड महिनामा ग्राहकबाट २ करोड रुपैयाँ विद्युत बक्यौता उठाएकाे छ । केन्द्रले लामो समयसम्म विद्युत महसुल नबुझाउने ग्राहकको लाइन काटेर कारबाही गरी यति बक्यौता उठाएकाे हो ।
गत मंसिर ११ गतेदेखि पुष २२ गतेसम्ममा महसुल नबुझाउने १ सय ८० ग्राहकको लाइन काटिएको वितरण केन्द्र प्रमुख सम्भु कसियत यादवले बताए । उनका अनुसार लाइन काटिएका ग्राहकमध्ये १ सय ५० जनाले २ करोड रुपैयाँ विद्युत बक्यौता बुझाएका छन् ।
बक्याैता तिरेपछि लाइन पुनः जोडिएको छ । बाँकी ३० जनाले अझै तिरेका छैनन् । १ सय ८० ग्राहकबाट ३ करोड ५४ लाख ४३ हजार रुपैयाँ बक्यौता उठ्न बाँकी थियाे ।
यस्तै, केन्द्रले यही अवधिमा विद्युत चुहावट नियन्त्रण अभियानका क्रममा २६ जना ग्राहकलाई पक्राउ गरी कारबाही गरेको छ । पक्राउ परेकाले जरीवानासहित २ लाख ४ हजार रुपैयाँ बुझाएपछि उनीहरुलाई छोडिएको छ ।
केन्द्रले कालो सूचीमा रहेको ग्राहकबाट पनि करिब ५ लाख रुपैयाँ असुली गरेको यादवले बताए । केन्द्रले लाइन काटेर बक्यौता उठाउने, चुहावट नियन्त्रण गर्ने अभियानलाई तिव्रता दिएको छ । केन्द्र अन्तर्गत ३.८९ प्रतिशत चुहावट छ ।
