ऊर्जा खबर
काठमाडौं । नेपाल विद्युत प्राधिकरणले भोलि बिहान ६ बजेसम्म सम्पूर्ण औद्योगिक क्षेत्रमा १४ घन्टा विद्युत कटौती सुरु गरेको छ । आज आइतबार (बैशाख १८ गते) अपरान्ह ४ बजेदेखि भोलि बिहान ६ बजेसम्म देशका सबै औद्योगिक फिडरहरू ट्रिप हुने भन्दै सूचना निकालिएको छ ।
प्राधिकरण भार प्रेषण केन्द्रले उक्त समयसम्म विद्युत आपूर्ति नहुने हुँदा आफैं व्यवस्थापन गर्न औद्योगिक क्षेत्रलाई सूचित गरेको छ । पछिल्लो समय देशमा गहिरिँदै गएको विद्युत संकटका कारण दुई सातादेखि निरन्तर औद्योगिक क्षेत्रमा विद्युत कटौती हुँदै आएको छ ।
बिनाजानकारी विद्युत आपूर्ति बन्द गरेको भन्दै देशैभरका उद्योगी व्यवसायीले विरोध जनाएपछि प्राधिकरणले बैशाख १४ गते पत्रकार सम्मेलन नै गरेर ‘अबदेखि सूचना दिएरमात्र लाइन काटिने’ बताएको थियो । तर, त्यसपछि पनि बिनाजानकारी निरन्तर आपूर्ति बन्द भइरहेको उद्योगीहरूले गुनासो गर्दै आएका छन् ।
शुक्रबार अर्थात् बैशाख १६ गते मोरङ उद्योग वाणिज्य संघ तथा १७ गते नेपाल उद्योग वाणिज्य महासंघले विज्ञप्ति नै जारी गरेर विद्युत कटौतीको विरोध जनाएका छन् । समस्या समाधानका लागि तत्काल पहल गर्न र लोडसेडिङको तालिका दिन पनि उनीहरूले माग गर्दै आएका छन् ।
