ऊर्जा खबर
काठमाडौँ । बन्दीपुर केबलकार एण्ड टुरिजम लिमिटेडले महाशिवरात्रिको अवसरमा केबलकार चोक, ठूल्ढुङ्गा, बन्दीपुर (बटम स्टेसन) मा शिवको मुर्ति स्थापना गर्ने भएकाे छ । यो धार्मिक कार्यक्रम मात्र नभई समुदायलाई नै एकताबद्ध हुन, एकता र साँझा आध्यात्मिकताको भावना जगाउने माध्यम पनि रहेको हुँदा यस कार्यक्रमले विभिन्न समुदायका मानिसहरूलाई आकर्षित गर्ने अपेक्षा गरिएकाे छ ।
कम्पनीका अनुसार जारी पुँजी २ अर्ब ५५ करोडको १२ प्रतिशतले हुन आउने रकम ३० करोड ६० लाख बराबरको १०० रुपैयाँ अङ्कित दरमा ३० लाख ६० हजार कित्ता सेयर मध्ये २ प्रतिशत स्थानीय, २ प्रतिशत प्रवासी नेपाली, सामुहिक लगानी कोष तथा कम्पनीका कर्मचारीहरूलाई छुट्याई बाँकी रहने सेयर सर्वसाधारणहरूमा निष्कासन गरिने भएकाे छ । साथै, बन्दीपुर केबलकार २०८१ बैशाख १ गतेदेखि सञ्चालनमा ल्याउन तीव्र गतिमा काम अघि बढिरहेको पनि कम्पनीले जानकारी दिएको छ ।
हालसम्म परियोजनाको काम ९० प्रतिशत सम्पन्न भइसकेको छ भने बाँकी काम पनि छिटै सम्पन्न गर्ने कम्पनीको लक्ष्य रहको छ । उक्त परियोजना दक्षिण एसियामा नै मौलिक परियोजना भएको कम्पनीले दाबी गरेको छ । परियोजनाको लागत ३ अर्ब ५८ करोड रुपैयाँ रहेकोमा बैंक ऋण १ अर्ब ३ करोड रहेको कम्पनीका वित्तीय निर्देशक शिवप्रसाद शर्माले बताए ।
