ऊर्जा खबर
काठमाडौँ । नेपाल विद्युत् प्राधिकरणको स्युचाटार सबस्टेसनस्थित स्युचाटार–मातातीर्थ १३२ केभी लाइन बसमा अचानक तार चुडिएपछि मर्मतका लागि विद्युत् आपूर्ति अवरुद्ध हुने भएको छ । प्राधिकरणले शुक्रबार एक सूचना जारी गर्दै मर्मत कार्यका लागि अपराह्न साढे ४ बजेदेखि साढे ५ बजेसम्म करिब एक घण्टा सटडाउन गरिएको जानकारी दिएको छ ।
यस आकस्मिक मर्मतका कारण स्युचाटार, पाटन, के–३ र टेकु सबस्टेसनहरूबाट विद्युत् आपूर्ति हुने उपत्यकाका विभिन्न क्षेत्रहरूमा विद्युत् सेवा अवरुद्ध हुन सक्ने प्राधिकरणले जनाएको छ ।
मर्मत कार्य तोकिएको समयभन्दा अगावै सम्पन्न भएमा सोहीअनुसार विद्युत सेवा पुनः सुचारु गरिने प्राधिकरणले जनाएको छ ।
