ऊर्जा खबर
काठमाडौं । चिलिमे जलविद्युत कम्पनीले ६ महिनाको अवधिमा ४० करोड १२ लाख ३१ हजार खुद नाफा कमाएको छ । कम्पनीले चालु आर्थिक वर्षको दोस्रो त्रैमाससम्मको अवधिमा सो मुनाफा कमाएको हो ।
गत वर्षको यही समयअवधिको तुलनामा ८७ लाख ८५ हजार रुपैयाँ बढी खुद नाफा कमाएको कम्पनीले जनाएको छ । कम्पनीका अनुसार गत वर्ष ३९ करोड २४ लाख ४५ हजार रुपैयाँ खुद नाफा कमाएको थियो ।
यो अवधिमा कम्पनीले २२ मेगावाटको चिलिमे जलविद्युत केन्द्रको विद्युत बिक्री गरी ६२ करोड ४८ लाख ९४ हजार रुपैयाँ आम्दानी गरेको छ । यो आम्दानी गत वर्षको तुलनामा घटेको हो । गत वर्ष ६३ करोड ९९ लाख २१ हजार रुपैयाँ आम्दानी गरेको थियो ।
कम्पनीले रसुवामा निर्माण गरेको चिलिमे जलविद्युत केन्द्र सञ्चालनमा छ । कम्पनीले सहायक कम्पनीमार्फत अघि बढाएका २ सय ७५ मेगावाटका ४ जलविद्युत आयोजना निर्माणाधीन छन् । १०२ मेगावाटको मध्यभोटेकोसी, १ सय ११ मेगावाटको रसुवागढी र ५७.३ मेगावाटका सान्जेन (माथिल्लो सान्जेन र सान्जेन ) का २ आयोजना निर्माणाधीन छन् ।
अरुण काबेलीले पनि २० करोड रुपैयाँ खुद नाफा कमायो
अरुण काबेली पावर कम्पनीले पनि २० करोड ३ लाख रुपैयाँ खुद नाफा कमाएको छ । कम्पनीले चालु आर्थिक वर्षको ६ महिना अवधिमा सो नाफा कमाएको हो ।
गत वर्ष यही समयअवधिमा १८ करोड २६ लाख रुपैयाँ खुद नाफा कमाएको थियो । यो अवधिमा कम्पनीले विद्युत बिक्रीबाट ४५ करोड ४१ लाख ६९ हजार रुपैयाँ आम्दानी गरको छ । गत वर्ष ३८ करोड ८७ लाख ७५ हजार रुपैयाँ आम्दानी गरेको थियो ।
