ऊर्जा खबर
काठमाडौं । पाल्पा जिल्लाको निस्दी गाउँपालिका– ७ को चारघरे र ज्यामिरे गाउँमा पहिलो पटक विद्युत सेवा पुगेको छ । लालीगुराँस सामुदायिक विद्युत सहकारी संस्थाले गाउँमा विद्युतीकरण गरेको हो ।
विद्युत सेवा विस्तार गर्दा गाउँका करिब ८० घरधुरी लाभान्वित भएको गाउँपालिकाका अध्यक्ष मुक्त बहादुर सारुले बताए । उनका अनुसार सामुदायिक विद्युतीकरणका लागि रकम बुझाएको लामो समयपछि विद्युत पुगेको हो ।
साविक ज्यामिरे गाउँ विकास समिती–१ को चारघरे र ज्यामिरे क्षेत्र विद्युत सेवा उपभोग गर्ने पहिलो गाउँ बनेको पनि सारुले बताए । बाँकी अन्य गाउँमा पनि छिट्टै सेवा विस्तार गरिनेछ ।
लामो समयदेखि विद्युत् सेवाको पर्खाइमा रहेका निस्दीको ज्यामिरे, चारघरे गाउँमा पहिलो पटक बत्ती पुगेपछि स्थानीयवासी खुसी भएका छन् । विद्युत सेवा विस्तार भएपछि खाना पकाउन, टिभी हेर्न, लेखपढ गर्न, मिल सञ्चालन गर्न सजिलो भएको स्थानीयले बताए ।
.jpg)
