ऊर्जा खबर
काठमाडौं । एनएमबी बैंक लिमिटेडले नेपालको हरित ऊर्जामा लगानी विस्तार गर्न बेलायती संस्था ब्रिटिश अन्तर्राष्ट्रिय लगानी (बिआईआई) बाट साढे २ करोड अमेरिकी डलर बराबरको लगानी भित्र्याउने भएको छ । उक्त परिमाणको लगानी भित्र्याउन बैंक र संस्थाबीच हालै सम्झौता समेत भइसकेको छ ।
बिआईआईबाट दोस्रो आवधिक कर्जा प्राप्त गर्ने एनएमबी नेपालको एकमात्र बैंक भएको छ । आन्तरिक स्रोतले मात्र हाल बजारको मागलाई धान्न नसकिरहेको परिस्थितिमा उक्त कर्जाले जलस्रोत तथा नवीकरणीय ऊर्जा क्षेत्रमा लगानी बढाउन मद्दत पुग्ने छ । यसरी, विस्तार गरिएको लगानीले जलस्रोत तथा नवीकरणीय ऊर्जा क्षेत्रको विकासमा महत्त्वपूर्ण भूमिका खेल्दै समग्र अर्थतन्त्रको विकासमा समेत टेवा पुग्ने अपेक्षा गरिएको छ ।
सम्झौताका क्रममा बैंकका प्रमुख कार्यकारी अधिकृत सुनिल केसीले कर्जा लगानीले ऊर्जा क्षेत्रमा कार्यरत परियोजनाहरू लाभान्वित हुनुको साथै बैंकको दिगो बैंकिङको अवधारणालाई एक कदम अगाडि बढाउने बताए ।
एनएमबी बैंक दि फिनान्सियल टाइम्स, लण्डनको ‘द बैंकर’ पत्रिकाद्वारा एसियाकै सर्वोत्कृष्ट बैंकको उपाधी ‘बैंक अफ दि इयर एसिया २०२१’ उपाधिबाट सम्मानित भएको छ । उसले २०१७, २०१८, २०२० र २०२१ का लागि पनि उक्त पत्रिकाद्वारा चार पटक नेपालकै उत्कृष्ट बैंकको उपाधी बैंक अफ दि इयर नेपाल प्राप्त गरिसकेको छ ।
बैंकले हाल देशभरि २०१ शाखाहरू, १३८ एटिएमहरू र ११ एक्सटेन्सन काउन्टरहरू मार्फत उच्चस्तरीय सेवा प्रदान गदै आइरहेको छ ।
