ऊर्जा खबर
काठमाडौं । जलविद्युत उद्यमी तथा स्वतन्त्र ऊर्जा उत्पादकहरूको संस्था नेपाल (इपान) का उपाध्यक्षसमेत रहेका मोरिससका लागि नेपाली महावाणिज्यदूत गणेश कार्कीलाई मानार्थ विद्यावारिधि उपाधि अर्थात् प्रोफेसनल डक्टरल सर्टिफिकेट (पिएचडी) प्रदान गरिएको छ ।
मलेसियाको युरोपियन इन्टरनेशनल विश्वविद्यालयले उनलाई ‘ग्लोबल लिडर एन्ड मेनेजमेन्ट’मा उक्त उपाधि प्रदान गरेको हो । आज (साउन १४ गते, ३० जुलाई) मलेसियाको होटेल विस्टेन क्वालालाम्पुरमा भएको एक समारोहमा मलेसियाकी राजकुमारी डा. रोमना मुराडको उपस्थितिमा कार्कीले उक्त उपाधि पाएको जनाइएको छ ।
कार्यक्रममा विश्वविद्यालयका तर्फबाट डा. इरवार्ड रोय कृष्णन, संस्थापक तथा महानिर्देशक डा. इडवार्ड रोय कृष्णन, व्यवस्थापन प्रमुख रोबर्ट ब्राण्डको उपस्थिति रहेको थियो । मिस एसिया रश्मि ठाकुरको समेत उपस्थिति रहेको समारोहमा विभिन्न क्षेत्रमा अध्ययन अनुसन्धान गरी पिएचडी उपाधि हासिल गर्ने १० जना र एमबिए उपाधि पाउने ४५ जना विद्यार्थी दिक्षित भएका थिए ।
