ऊर्जा खबर
बेइजिङ । ऊर्जा, जलस्रोत तथा सिँचाइ मन्त्री दीपक खड्काले बेइजिङस्थित नेपाली राजदूतावासको भ्रमण गरेका छन् । साङ्घाई सहयोग संगठनको पाँचौँ ऊर्जा मन्त्रीस्तरीय बैठकमा सहभागिता जनाइसकेपछि उनले दूतावासको भ्रमण गरेका हुन् ।
भ्रमणका क्रममा मन्त्री खड्काले दूतावासका पदाधिकारीसँग भेटघाट गरी दूतावासको वर्तमान अवस्था, हालका गतिविधि र समस्याबारे विस्तृत छलफल गरेका छन् ।
छलफलका क्रममा राजदूतावासका तर्फबाट कार्यसुविधा, जनशक्ति र स्रोतको अभाव लगायतका विषय प्रस्तुत गरिएको थियो । मन्त्री खड्काले उल्लिखित समस्या समाधानका लागि परराष्ट्र मन्त्रालयसँग आवश्यक पहल गर्ने र समन्वय गरिने आश्वासन दिएका छन् ।
चीन भ्रमणका दौरान मन्त्री खड्काले बेइजिङमा आयोजित नेपाली पर्यटन व्यवसायीहरूको ट्रेड फेष्टमा समेत सहभागिता जनाए । उनले पर्यटन व्यवसायीहरूसँग अन्तर्क्रिया गर्दै नेपाली पर्यटन र व्यवसाय प्रवर्द्धनका लागि पहल गर्नुपर्नेमा जोड दिए ।
