ऊर्जा खबर
काठमाडौँ । शशिला मोटर्स प्रालिले चिनियाँ भ्यान्चे ब्रान्डको २२ सिटे विद्युतीय यात्रुबाहक बस नेपाल भित्र्याउने भएको छ । एक पटकको फुल चार्जमा ३ सय किलोमिटर गुड्ने यो बसमा ४०० एनएमको टर्क र १४० किलोवाटको पिक पावर रहने कम्पनीले बताएको छ । १२३ किलोवाटको सीएटीएल लिथियम आइरन फोस्फेट ब्याट्री जडान भएको हुने यो बस पूर्ण रुपमा वातानुकुलित (एयर कन्डिसन) र सबैखाले सुरक्षाका विशेषता उपलब्ध रहेको शशिला मोटर्सका प्रबन्ध निर्देशक सन्तोष खतिवडाले बताए ।
उनका अनुसार २५ फिट लम्बाई रहेको यो बसका सिटहरू फराकिला रहेको र खाली ठाउँ पर्याप्त हुने भएकाले लामो तथा छोटो दूरीमा सञ्चालन गर्नका लागि यात्रुमैत्री छ । १२३ किलोवाटको ब्याट्री क्षमताको विद्युतीय गाडी नेपालमै पहिलो पटक ल्याउन लागिएको हो । उनले बस आइपुग्नुअघि नै आवश्यक पार्टपबूर्जा, सर्भिसिङ तथा मर्मत सबैको ब्यवस्था मिलाइने र बस सञ्चालकलाई बिना झन्झट सेवा दिइने छ ।
आउँदो दशैँलगायत चाडपर्वलाई लक्षित गरी ल्याउन लागिएको उक्त बसको बुकिङ्ग भने अहिलेदेखि नै खुला गरिएको छ । बसको मूल्य निर्धारण हुन बाँकी नै रहे पनि अहिले नै बुकिङ गर्ने पहिलो ५० ग्राहकले ८९ लाख ९० हजारमा पाउने र त्यसपछि मूल्य केही बढ्ने कम्पनीले जनाएको छ ।
विगत १० वर्षदेखि व्यवसायिक गाडीहरू बिक्री वितरण कम्पनी पछिल्लो समय नेपालका लागि हाइगर विद्युतीय बसको आधिकारिक बिक्रेता समेत रहँदै आएको छ । कम्पनी अब नेपालको लागि भ्यान्चे ब्राण्डका सबै बस तथा भ्यानहरूको पनि आधिकारिक बिक्रेता बनेको छ ।
