ऊर्जा खबर
काठमाडौँ । सल्यानको दार्मा गाउँपालिकाका २०० घरमा राष्ट्रिय प्रसारण लाइनको बिजुली पुगेको छ । गाउँपालिकाको वडा नम्बर २ लिरापाज, वडा–४ सिँगारीकोट पुखाद र वडा–६ भुर्तिवाङमा बुधबार विद्युत् सेवा पुर्याइएको हो ।
नेपाल विद्युत् प्राधिकरणको सल्यान वितरण केन्द्रले ३ थान ट्रान्सफर्मरसहित वितरण संरचना निर्माण गरी उक्त गाउँहरूमा विद्युत् सेवा पुर्याएको केन्द्र प्रमुख नरेशदत्त रावलले ऊर्जा खबरसँग बताए । गाउँपालिका अध्यक्ष, वडा अध्यक्षसहितका जनप्रतिनिधिहरूको सहजीकरण, स्थानीयवासीको सहयोग, निर्माण व्यवसायीको सक्रियता एवम् केन्द्रको अग्रसरतामा उक्त स्थानमा विद्युत् पुर्याउन सफल भएको उनले जानकारी दिए ।
उनकाका अनुसार विद्युत् सेवा पुगेपछि सौर्य बत्तीको मधुरो उज्यालोमा बस्न बाध्य त्यस क्षेत्रका स्थानीयले अब राष्ट्रिय प्रसारणको गुणस्तरीय विद्युत् पाउने भएपछि खुसी भएका छन् । विस्तारित क्षेत्रका घरहरूमा बत्ती बाल्न मिटर वितरण सुरु भइसकेको छ ।
पर्याप्त वितरण संरचनाको अभावमा उक्त क्षेत्रका सबै घरधुरीमा अझै पनि विद्युत् पुर्याउन नसकिएको र त्यसका लागि प्रयास जारी रहेको समेत उनले बताए ।
