बल्खु तरकारी बजारमा एनएमबीको क्यूआर कोडबाट कारोबार गर्न सकिने

काठमाडौं । बल्खु कृषि तथा तरकारी बजारमा एनएमबी बैंकको क्युआर कोडबाट कारोबार गर्न सकिने भएको छ । बैंकले नगदरहित भुक्तानीलाई प्रवद्र्धन गर्ने उद्देश्यले तरकारी बजारमा क्युआर कोडबाट कारोबार गर्न सकिने व्यवस्थाको सुरुवात गरेको हो ।

शुक्रबार विशेष कार्यक्रमको आयोजना गरि क्युआर कोडबाट आर्थिक कारोबार गर्न सकिने सुविधाको शुभारम्भ गरिएको छ । कार्यक्रमबाट तरकारी बजारमा नगदरहित कारोवार प्रवद्र्धन तथा साक्षरता विस्तार गर्ने उद्देश्यले आयोजित कार्यक्रममा क्युआर कोड मार्फत साना तथा मझौला उद्यमीहरुलाई डिजिटल बैंकिङ्गतर्फ प्रोत्साहन गरिएको बैंकले जनाएको छ । 

नेपाल राष्ट्र बैंकका गर्भनर महाप्रसाद अधिकारीले क्युआर कोडबाट भुक्तानी गर्ने सुविधाको उद्घाटन गरे । कार्यक्रममा बैंकका अध्यक्ष पवनकुमार गोल्यान, प्रमुख कार्यकारी अधिकृत सुनिल केसी, स्थानीय निकायका पदाधिकारी, सुरक्षा निकाय, कुमारी क्लबका सदस्य, स्थानीय कृषि व्यवसायीहरू सहभागी थिए । 

प्रमुख कार्यकारी अधिकृत केसीले तरकारी बजारमा बुढाथोकी भेजिटेवल सप्लायर्स र सजनी भेजिटेवल सप्लायसलाई सहुलियतपूर्ण कर्जाको प्रस्ताव पत्र पनि प्रदान गरेका छन् । साना तथा मझौला उद्यमीलाई केन्द्रविन्दुमा राखेर सहकार्य गर्ने नीतिअनुरुप उनीहरूलाई सहुलियतपूर्ण कर्जको प्रस्ताप पत्र दिइएको हो । 

बैंकले वर्तमान अवस्था र सुरक्षाका मापदण्डलाई मध्यनजर गर्दै आगामी दिनमा आफ्ना ग्राहकलाई नगदरहित भुक्तानी सेवा उपयोग गर्न प्रोत्साहन गर्नुका साथै कृषि तथा सहुलियतपूर्ण कर्जा सहजताका लागि थप कार्यक्रम गर्नेमा प्रतिबद्धा समेत जनाएको छ ।