ऊर्जा खबर
काठमाडौँ । विद्युत् उत्पादन कम्पनी (भियुसिएल) का प्रमुख कार्यकारी अधिकृत (सिइओ) बखतबहादुर शाहीले पदबाट राजीनामा दिएका छन् । गत शुक्रबार कम्पनीका पदेन अध्यक्षसमेत रहेका ऊर्जा, जलस्रोत तथा सिँचाइ मन्त्रालयका नवनियुक्त सचिव चिरञ्जीवी चटौतसमक्ष उनले राजीनामा बुझाएका हुन् ।
शाहीले राजीनामा पत्रमा स्वास्थ्यमा समस्या बढेकाले जिम्मेवारी निर्वाह गर्न कठिन भएको कारण देखाएका छन् । 'चिकित्सकले मलाई तनावमुक्त रहँदै केही समय आराम गर्न सिफारिस गर्नुभएको छ । त्यसैले स्वास्थ्यलाई प्राथमिकता दिँदै पद छोड्ने निर्णय गरेको हुँ,' उनले भनेका छन् ।
निजी क्षेत्रका करिब एक दर्जन जलविद्युत् आयोजनामा प्रमुख भूमिका निर्वाह गरेका शाही २०८० साउन १८ गते खुला प्रतिस्पर्धात्मक प्रक्रियामार्फत सिइओको जिम्मेवारीमा आएका थिए ।
.jpg)
