ऊर्जा खबर
काठमाडौं । चीनको स्वशासित क्षेत्र तिब्बतस्थित छोचेन खोला र पुरेपू साङ्पो नदीको संगमस्थल नजिकैको एउटा ठूलो हिमताल (ग्लेशियर) फुटेको सूचना आएको जिल्ला प्रशासन कार्यालय रसुवाले जानकारी दिएको छ ।
चिनियाँ अधिकारीहरूले ताल फुटेको औपचारिक जानकारी दिएपछि रसुवाका प्रमुख जिल्ला अधिकारी नरेन्द्र परियारले नदी तटीय क्षेत्रका बासिन्दाहरूलाई उच्च सतर्कता अपनाउन र सुरक्षित स्थानतर्फ लाग्न आग्रह गरेका छ ।
ताल फुटेपछि त्रिशूली (भोटेकोशी) नदीमा अकस्मात भीषण बाढी आउन सक्ने जोखिम उच्च बनेको छ । बाढीका कारण जलविद्युत् आयोजनाहरू, पुल, सडक तथा नदी किनारका बस्तीहरू पुनः प्रभावित हुने भन्दै स्थानीय प्रशासनले तटीय क्षेत्रमा अलर्ट जारी गरेको छ ।
नदी किनार, होचा क्षेत्र तथा तटीय बस्तीमा बसोबास गर्ने सर्वसाधारणलाई तुरुन्तै अग्लो र सुरक्षित स्थानतर्फ सर्न आग्रह गरिएको छ । नदी किनारमा कार्यरत श्रमिक, प्राविधिक तथा जलविद्युत् कम्पनीहरूलाई उपकरण र कर्मचारीहरूलाई सुरक्षित राख्न भनिएको छ ।
आधिकारिक निकाय र स्थानीय प्रशासनको सूचनालाई मात्र ध्यान दिन र नदी किनारमा रमिता हेर्न वा भिडियो/फोटो खिच्न नजान अनुरोध गरिएको छ । सुरक्षा निकायहरूलाई सम्भावित जोखिम सम्बोधन गर्न र उद्धार कार्यका लागि तयारी अवस्थामा राखिएको रसुवा प्रशासनले जनाएको छ ।
