ऊर्जा खबर
काठमाडौं । गुल्मीको चन्द्रकोट गाउँपालिका वडानम्बर–४ शान्तिपुरमा अवस्थित श्री उदय माध्यमिक विद्यालयमा मौसम स्टेसन स्थापना गरिएको छ । जिल्लामा ५ मेगावाटको हुग्दी खोला जलविद्युत केन्द्र सञ्चालन गरिरहेको रु रु जलविद्युत परियोजना लिमिटेडको प्राविधिक तथा आर्थिक सहयोगमा मौसम स्टेसन सञ्चालन गरिएको हो ।
कृषि सम्बन्धी प्राविधिक विषय अध्यापन हुने यस विद्यालयमा अध्ययन गर्ने विद्यार्थीहरू तथा कृषकहरूलाई लक्षित गरी मौसम स्टेसन स्थापना गरिएको कम्पनीका बरिष्ठ अधिकृत बलदेव बलामीले बताए । ‘करिब २ लाख ८३ हजार रुपैयाँ लगानीमा मौसम स्टेसन स्थापना गरेका छौ’, उनले ऊर्जा खबरसँग भने, ‘यसबाट सापेक्षित आद्रता, हावाको मात्रा, तापक्रम र वर्षाको तथ्यांकबारे जानकारी उपलब्ध हुनेछ ।’
स्टेसनका आधारमा कुन समयमा कुन बाली लगाउन उपयुक्त हुन्छ भनेर कृषि विशेषज्ञ र प्राविधिकहरूले योजना निर्माण गर्ने गाउँपालिका अध्यक्ष युवराज केसीले बताए । मौसम स्टेसन सम्भवतः नेपालका विद्यालयस्तरका शैक्षिक संस्थामा स्थापना गरिएको पहिलो स्टेसन रहेको जनाइएको छ ।
कम्पनीको ५ मेगावाटको माथिल्लो हुग्दी जलविद्युत आयोजनाले २०७१ साल चैतदेखि नियमित विद्युत उत्पादन गरिरहेको छ ।
