ऊर्जा खबर
काठमाडौँ । भोटेकोसी नदीमा आएको भीषण बाढीका कारण अवरुद्ध बनेको नुवाकोटको बट्टार तथा त्रिशूली बजार क्षेत्रमा विद्युत् सेवा पुनःसुचारु भएको छ । नेपाल विद्युत् प्राधिकरणले द्रुत गतिमा वैकल्पिक व्यवस्था मिलाई प्रभावित क्षेत्रमा विद्युत् आपूर्ति सञ्चालनमा ल्याएको हो ।
प्राधिकरणले बालाजु–त्रिशूली र चपली–देवीघाट ६६ केभी प्रसारण लाइनलाई ११ केभीमा चार्ज गरी बट्टार, त्रिशूली बजार तथा आसपासका क्षेत्रमा विद्युत् सेवा सुचारु गरेको छ । बाढीका कारण नियमित विद्युत् आपूर्ति प्रणालीका संरचनामा क्षति पुगेपछि उपलब्ध प्रसारण पूर्वाधारको वैकल्पिक उपयोग गर्दै सेवा पुनःस्थापनाको काम अघि बढाएको थियो ।
बाढीबाट क्षतिग्रस्त अन्य विद्युत् संरचनाको मर्मत तथा पुनःनिर्माण कार्यलाई तीव्र बनाइएको छ । साथै, बाढी प्रभावित अन्य सम्पूर्ण क्षेत्रमा पनि चाँडोभन्दा चाँडो विद्युत् सेवा पूर्णरूपमा नियमित बनाउन प्राविधिक टोली निरन्तर खटिरहेको प्राधिकरणले जनाएको छ ।
