ऊर्जा खबर
काठमाडौं । नेपाल र बंगलादेशबीच आगामी तीन महिनाभित्र करिब ५० मेगावाट विद्युत नेपालबाट बंगलादेश निर्यात गर्ने सहमति भएको छ । ऊर्जा सहकार्यका लागि गठित सचिवस्तरीय संयुक्त सञ्चालन समिति (जेएससी) को बिहीबार (भदौ ९ गते) सम्पन्न बैठकमा द्धिपक्षीय सहमति भएको हो ।
नेपालको विद्युत बंगलादेशसम्म पु¥याउन भारतीय भूमिको प्रयोग हुने हुँदा भारतसँग त्रिपक्षीय बैठकका लागि आग्रह गर्ने निर्णय समेत उक्त बैठकले गरेको छ ।
बंगलादेशको भेडमारा–एचपीडीसीको संरचनामा नेपालबाट ४० देखि ५० मेगावाट हाई भोल्टेज डारेक्ट करेन्ट लान सक्ने अवस्था देखिएकोले यसका लागि तीन महिनाभित्र त्रिपक्षीय बैठक बसेर टुंगो लगाउने निर्णय भएको उर्जा, जलस्रोत तथा सिँचाइ मन्त्रालयले जनाएको छ ।
मन्त्रालयका अनुसार यसका लागि नेपाल विद्युत प्राधिकरण, भारतीय विद्युत व्यापार कम्पनी (एनभीभीएन) र बंगलादेश पावर डेलभपेन्ट बोर्डबीच बैठक बस्नेछ । बंगलादेश सरकारले नेपालबाट बिजुली आयात गर्ने योजना अघि सारेपछि यसलाई जेएससी बैठकले मूर्त रूप दिएको हो ।
बैठकमा नेपालका तर्फबाट ऊर्जा, जलस्रोत तथा सिँचाइ सचिव सुशीलचन्द्र तिवारी, सहसचिव मधुप्रसाद भेटुवाल लगायत १५ जना र बंगलादेशका तर्फबाट त्यहाँका ऊर्जा तथा खनिज स्रोत मन्त्रालयका सचिव हबिबुर रहमान सहितको टोली सहभागी भएको मन्त्रालयले जानकारी दिएको छ ।
