ऊर्जा खबर
काठमाडौँ । अप्पर लोहोरे खोला हाइड्रोपावर कम्पनी लिमिटेडले हाल कायम चुक्ता पुँजीको १५० प्रतिशत (१ः१.५ अनुपातमा) हकप्रद सेयर जारी गर्ने भएको छ । पुस ८ गते बसेको कम्पनी सञ्चालक समितिको बैठकले सो निर्णय गरेको कम्पनीले जनाएको छ ।
कम्पनीका अनुसार उक्त हकप्रद सेयर जारी गर्ने विशेष प्रस्तावलाई पुस ३० गते बोलाइएको कम्पनीको तेस्रो, चौथो तथा पाँचौँ वार्षिक साधारण सभाबाट पारित गरेपछि जारी गरिने छ । साधारण सभाले हकप्रदबाट प्राप्त हुने पुँजीलाई कुन प्रयोजनमा लगानी भन्नेबारे सञ्चालक समितिले गरेको निर्णयसमेत पारित गर्ने छ ।
साधारण सभा प्रयोजनका लागि पुस २१ गते कम्पनीले सेयरधनी दर्ता किताब बन्द (बुक क्लोज) गर्ने भएको छ । त्यसो हुँदा पुस २० गतेसम्म नेपाल स्टक एक्सचेन्जमा कारोबार भई सेयरधनी कायम हुनेहरूले मात्र कम्पनीको हकप्रद सेयर खरिद गर्न सक्नेछन् ।
कम्पनीले दैलेखको लोहोरे खोलामा ४ मेगावाटको जलविद्युत् केन्द्र सञ्चालन गरिरहेको छ ।
