ऊर्जा खबर
काठमाडौं । बागलुङको कुस्मिसेरामा १.५ मेगावाटको ठेउले खोला जलविद्युत आयोजना निर्माण गरी सञ्चालनमा ल्याएको बाराही हाइड्रो पावर पब्लिक लिमिटेडको १ लाख ४६ हजार कित्ता साधारण सेयर ६७८ जनालाई बाँडफाँड गरिएको छ । कम्पनीको आज (मंसिर ८ गते) बसेको सञ्चालक समितिको बैठकले सेयर बाँडफाँड गर्ने निर्णय अनुमोदन गरेको हो ।
कम्पनीले २ लाख ५० हजार कित्ता सेयर बिक्रीका लागि आवेदन माग गरेकोमा १ लाख ४ हजार कित्ताका लागि भने प्रस्ताव प्राप्त भएन । आवेदन प्राप्त नभएको बाँकी सेयर सर्वसाधारणका लागि छुट्ट्याइएको परिमाणमा थप गरी निष्कासन गर्ने कम्पनीका प्रबन्ध निर्देशक सूर्यप्रसाद अधिकारीले जानकारी दिए ।
कम्पनीले बाग्लुङ जिल्लाको जैमनी नगरपालिका वडा नम्बर १,४ र ५ साविक कुम्मीसेरा, सर्कुवा र विनामारे गाविस तथा जैमिनी नगरपालिकाका अन्य वडाहरूका स्थानीय बासिन्दाहरूका लागि सेयर निष्कासन गरेको थियो ।
६८२ आवेदकले न्यूनत्तम १० कित्तादेखि अधित्तम १० हजार कित्तासम्म सेयर खरिदका लागि प्रस्ताव पेश गरेकोमा ४ वटा आवेदनको रित नपुगेको हुँदा बाँडफाँडमा सामेल नगराइएको निष्कासन तथा बिक्री प्रबन्धक एनआइबिएल एस क्यापिटल लिमिटेडले जनाएको छ । आवेदन संकलनका लागि एनएमबी बैंक र ग्लोबल आइएएमई बैंकको कुस्मीसेरा शाखा, कुमारी बैंकको राहाले शाखा र गरिमा विकास बैंकको ट्राफिक चोक शाखा कार्यालय तोकिएको थियो ।
कम्पनीले स्थानीयको सेयर निष्कासन गरिसकेको हुँदा दोस्रो चरणमा सर्वसाधारणका लागि छुट्ट्याएको ४ लाख ५० हजार कित्ता साधारण सेयर निष्कासन गर्ने प्रक्रिया अगाडि बढाउने जनाएको छ । २०७५ असार २४ गतेदेखि विद्युत उत्पादन भइरहेको आयोजनाको विद्युत् ७.५ किलोमिटर दूरीमा रहेको ३३ केभी कुस्मा सबस्टेसनमा जोडिएको छ । प्राधिकरणले उत्पादित विद्युतको हिउँदमा प्रतियुनिट ७.४२ रुपैयाँ र बर्खामा ४.२४ रुपैयाँ तिरिरहेको छ भने वार्षिक ऊर्जा औसत ८.२१७ गिगावाट घन्टा उत्पादन भइरहेको छ ।
कति आवेदन दिनेले कति कित्ता पाए
