ऊर्जा खबर
काठमाडौं । मनकामना दर्शन प्रालिले मनकामना केबलकारलाई डिजिटल प्रविधिमा स्तरोन्नती गरेको छ । केबलकारले एनालग प्रविधिबाट २५ वर्षपछि डिजिटल प्रविधिमा स्तरोन्नती गरेको हो । अस्ट्रियाको डोपलमेयर कम्पनीको डी–कनेक्ट भनिने डिजिटल प्रणालीमा स्तरोन्नति गर्ने काम सन् २०२१ मै सम्पन्न गरिसकेको कम्पनीले बाँकी काम आगामी सन् २०२४ को भदौ/असोजमा सम्पन्न गर्ने योजना अनुसार काम गरिरहेको जनाएको छ । सोको लागि आवश्यक केही उपकरण आयात भइसकेको छ ।
अबको चरणमा नियन्त्रण प्रणाली सञ्चार केबलका साथै केबलकारलाई केबुलको लठ्ठा फेरेर पहिलेकै जस्तो नयाँ र स्तरीय प्रविधिको स्वरुपमा सञ्चालन गर्ने जनाइएको छ । कम्पनीका प्रबन्ध निर्देशक राजेशबाबु श्रेष्ठले २५ वर्षको दौरानमा कम्पनीले केबुलकारको एनालग प्रविधिलाई डिजिटल प्रणालीमा स्तरोन्नति गरेको बताए । केबलकार स्तरोन्नति गर्न करिब ४५ करोड रुपैयाँ लगानी हुने उनले जानकारी दिए ।
केबलकारले सुरुआती वर्षमा २–३ लाख यात्रुलाई सेवा दिएकोमा अहिले बढेर वार्षिक ११ लाख यात्रुलाई सेवा दिइरहेको छ । यस वर्ष १२ लाख ५० हजार यात्रुलाई सेवा दिने केबलकार कम्पनीको लक्ष्य छ । साथै सन् २०२४ को अन्त्यमा वा २०२५ सुरुबाटै सञ्चालन गर्ने गरी मनकामनामा केबुलकार हाताभित्र सुविधा सम्पन्न रिसोर्ट पनि निर्माण भइरहेको छ । रिसोर्ट सञ्चालनमा आएपछि मनकामना र वरिपरिका क्षेत्रलाई धार्मिक साथै अन्य पर्यटकीय गन्तव्य बनाउने लक्ष्य रहेकाे श्रेष्ठले बताए । मनकामना दर्शन प्रालि २०५३ कात्तिक २२ गते स्थापना भएको कम्पनी हो । प्रा लि ले २०५४ माघको अन्तिम साता केबलकार निर्माण प्रारम्भ गरी २०५५ मंसिर ८ गतेबाट व्यावसायिक सेवा सुरु गरेको हो ।
.jpg)
