ऊर्जा खबर
काठमाडौँ । मेलम्ची खानेपानी आयोजनामा भएको भ्रष्टाचार काण्डमा दोषी ठहर भएका ४ जनालाई ८ वर्ष १ महिनाको जेल सजाय सुनाइएको छ ।अख्तियार दुरुपयोग अनुसन्धान आयोगले २०८० फागुन ६ गते मेलम्चीको भ्रष्टाचारमा संलग्न रहेको आरोप लगाएर ३ जना पूर्वसचिवसहित १५ जनाविरुद्ध विशेष अदालत काठमाडाैँमा मुद्दा दायर गरेको थियो । मुद्दामा आयोजनाको परामर्शदाता र निर्माण कम्पनीलाई पनि प्रतिवादी बनाइएको थियो ।
सोही मुद्दाको सुनुवाइ गर्दै अदालतका अध्यक्ष टेकनारायण कुँवर र सदस्यहरू तेजनारायण सिंह राई र मुरारीबाबु श्रेष्ठको इजलासले भदौ २५ गते पूर्व सचिव ठाकुरसहित चार जनालाई दोषी ठहर गरेको थियो ।पूर्वसचिव गजेन्द्र ठाकुरसहित ४ जनालाई उक्त सजाय सुनाएको हो ।
पूर्वसचिव ठाकुरलाई भ्रष्टाचार मुद्दामा आठ बर्ष कैद सजाय तोकिएको छ । ठाकुरबाट १० करोड १० लाख रुपैयाँ बिगो र सोही बराबर जरिवाना तिर्नुपर्ने फैसला छ । उनी मेलम्ची खानेपानी समितिका तत्कालीन अध्यक्ष हुन् ।
यसैगरी, मेलम्चीका तत्कालीन कार्यकारी निर्देशक सूर्यराज कँडेललाई पनि ठाकुरसरह नै ८ वर्ष कैद, जरिवाना र बिगो असुलउपर हुने फैसला भएको छ ।
त्यस्तै दोषी ठहर भएका रामचन्द्र देवकोटालाई कैद ८ वर्ष जेल र बिगो तथा जरिवना गरी २ करोड ९५ लाख रुपैयाँ असुल गर्नुपर्ने आदेश छ ।
परामर्शदाता शिवकुमार शर्मालाई मतियार मान्दै २ करोड ९५ लाख रुपैयाँ बिगो निर्धारण गरेको छ । आठ वर्ष कैद तोकिए पनि ६५ वर्षभन्दा बढी उमेर भएका कारण ज्येष्ठ नागरिक ऐनअनुसार शर्माको २५ प्रतिशत कैद घटाएको छ । उनलाई ६ वर्ष मात्र कैद सजाय सुनाइएको छ ।
सोही मुद्दामा पूर्व सचिव भीम उपाध्यायसहित ११ जनाले सफाइसमेत पाएका छन् ।
यस्ताे छ फैसलाकाे पाठ
.jpg){kind=spacer}