ऊर्जा खबर
काठमाडौं । चालू आर्थिक वर्ष (आव) २०७९/८० को ९ महिनामा करिब ७ अर्ब रुपैयाँ बराबरको २४५१ वटा विद्युत सवारी साधन आयात भएको छ । गत साउनदेखि चैत मसान्तसम्मको अवधिमा उक्त विद्युतीय सवारी आयात भएको हो ।
भन्सार विभागको तथ्यांक अनुसार गत वर्ष यही अवधिको तुलनामा विद्युतीय सवारी साधन आयात बढेको हो । समीक्षा अवधिसम्ममा ६ अर्ब ८५ करोड ७९ लाख रुपैयाँ बराबरको २४५१ वटा विद्युतीय सवारी साधन आयात भएको विभागले जनाएको छ । गत वर्ष यो अवधिमा १४७३ विद्युतीय सवारी आयात भएका थिए ।
विभागको तथ्यांक अनुसार अहिले आयात भएकामध्ये सबैभन्दा बढी १०० किलोवाट क्षमताको सवारी छन् । १०० किलोवाट क्षमता भएको २३७९ सवारी आयात भएको विभागको तथ्यांकमा छ । यस्तै, १०० किलोवाटदेखि २०० किलोवाट क्षमता भएको ६५ र २०० किलोवाटदेखि ३०० किलोवाट क्षमता भएको ७ वटा विद्युतीय गाडी आयात भएको विभागले जनाएको छ ।
भारतबाट टाटाको विद्युतीय गाडी नेक्सन र टिगोर इभी र महिन्द्राका गाडीहरू आयात भएका छन् । यस्तै, चीनबाट समा नेटा भी, बीवाइडी, एमजी र टेस्लाका कार, जिप, भ्यान गाडीहरु आयात हुने गरेको छ ।
विभागका अनुसार समीक्षा अवधिमा सबैभन्दा धेरै विद्युतीय सवारी साधन भारतबाट आयात भएका छन् । उक्त अवधिमा भारतबाट १ सय किलोवाट क्षमताका १७५५ वटा विद्युतीय सवारी आयात भएका छन् ।
भारतपछि सबैभन्दा धेरै विद्युतीय गाडी चीनबाट नेपाल भित्रिएका छन् । चीनबाट १ सय किलोवाट क्षमताका ३८१, दक्षिण कोरियाबाट २४०, र इन्डोनोसियाबाट ३ वटा विद्युतीय सवारी साधान आयात भएका छन् ।
यस्तै, दक्षिण कोरियाबाट १०० देखि २०० किलोवाट क्षमताका २० वटा, चीनबाट ४३, बेलायतबाट २ वटा विद्युतीय सवारी नेपाल भित्रिएका छन् । भन्सार विभागका अनुसार चीनबाट २०० देखि ३०० किलोवाट क्षमताका ५ वटा र बेलायतबाट २ वटा विद्युतीय गाडी नेपाल भित्रिएका हुन् ।
पेट्रोलियम पदार्थको मूल्यवृद्धि र आव २०७८/७९ को बजेटले विद्युतीय सवारीमा अन्तशुल्क खारेज र कर घटाएपछि बिजुली गाडीको आयात र प्रयोग बढ्दै गएको छ ।
