ऊर्जा खबर
काठमाडौं । दार्चुलामा पहिचान भएको ५३.८५ मेगावाटको चमेलिया जलविद्युत आयोजना निर्माणका लागि ११ अर्ब १५ करोड रुपैयाँ लागत अनुमान गरिएकाे छ । आयोजनाको वातावरणीय प्रभाव मूल्यांकन (इआईए) प्रतिवेदन अनुसार आयोजना सम्पन्न गर्न उक्त रकम लाग्ने देखिएका हो ।
विद्युत विकास विभागले गरेकाे इआईएअनुसार प्रतिमेगावाट लागत २० करोड ६० लाख ४६ हजार रुपैयाँ रहेको छ। सम्भाव्यता अध्ययन भइसकेको आयोजना दार्चुलाको अपि हिमाल गाउँपालिका–१ मा पर्छ ।
चमेलिया नदीको पानी फर्काउन ६.५ मिटरको उचाई र ३० मिटर लम्बाई भएको बाँध निर्माण गरिनेछ । ५५८८ मिटरको हेडरेस टनेल निर्माण गरिनेछ । सतही पेनस्टक पाइपको लम्बाइ १२१७ मिटर र भूमिगत पेनस्टक पाइपको लम्बाइ ६५३ मिटर हुनेछ ।
आयोजनाका लागि २६.०४६६ हेक्टर जग्गा आवश्यक पर्छ । यो आयोजनाबाट वार्षिक ३१९.१२ गिगावाट घन्टा विद्युतीय ऊर्जा उत्पादन हुनेछ । प्रस्तावित आयोजनामा १२१७.९६ मिटर सतही र ६५३.६७ मिटर भुमिगत पेनस्टक पाइप रहनेछ ।
निर्माण थालेको ४ वर्षमा निर्माण सम्पन्न गर्ने लक्ष्य छ । आयोजना निर्माण सम्पन्न भएपछि ३३ किलोमीटर प्रसारणलाइन निर्माण गरेर बलाच सबस्टेसनमा जोडिने छ ।
