ऊर्जा खबर
काठमाडौं । म्याग्दीमा विद्युतीकरण विस्तारका लागि निर्माण गरिएको ३३/११ केभी मिलनचोक–रातोढुङ्गा प्रसारण लाइनको परीक्षण सुरु भएको छ । नेपाल विद्युत प्राधिकरणले निर्माण गरेको यो लाइनको परीक्षण बिहीबारबाट सुरु गरिएको हो ।
पर्वतको जलजला गाउँपालिका–४ मोहनचोकदेखि म्याग्दीको मालिका गाउँपालिका–६ रातोढुङ्गा जोड्ने २२ किलोमिटर लामो प्रसारण लाइन चार्ज गरी रातोढुङ्गामा निर्माण भएको ३३/११ केभी सबस्टेसन पनि परीक्षण गरिएको प्राधिकरणले जनाएको छ ।
लाइन मिलन चाेक सबस्टेसन हुँदै बेनी बजार, चुत्रेणी सिंगा,ताताेपानी, सिमलचाैर, बाबियाबजार हुँदै राताेढुङ्गा सबस्टेसन पुग्नेछ ।
प्राधिकरणको वितरण प्रणाली सुदृढीकरण तथा विस्तार आयोजना अन्तर्गत निर्माण भएको प्रसारण लाइनबाट प्रवाह गरिने भएकाले लाइनका खम्बा, तारलगायत संरचना नछुन र नचलाउन सूचनामार्फत अनुरोध गरेको छ ।
प्रसारण लाइनको खम्बा गाड्ने, तार तान्ने, सवस्टेसनमा संरचना निर्माण तथा उपकरण जडानको काम सकिएको छ ।
प्राधिकरणमार्फत सबस्टेसन र प्रसारण लाइन निर्माण गर्न सन् २०१६ मा ठेक्का सम्झौता भएको थियो । प्रसारण लाइन सन् २०१८ को डिसेम्बरमा सक्ने लक्ष्य थियो । सुरुवाती चरणमा जग्गा अधिग्रहणमा भएको ढिलाइका कारण प्रभावित बनेको थियो ।
खम्बा गाड्ने र तार तान्ने क्रममा जग्गाधनीको अवरोधले रोकिएको आयोजनाको काम गत जेठ महिनामा चार वर्षपछि सञ्चालन भएको थियो । ४ वर्षअघि नै सम्पन्न हुनुपर्ने सवस्टेसन र प्रसारण लाइन निर्माणमा भएको ढिलाइले म्याग्दीको पश्चिमी क्षेत्रमा पर्ने मङ्गला, मालिका र धवलागिरि गाउँपालिकामा केन्द्रीय प्रसारण लाइन विस्तार र विद्युत् आपूर्ति प्रभावित भएको छ ।
रातोढुुङ्गा सवस्टेसन र प्रसारण लाइन सञ्चालन भएपछि पश्चिमी क्षेत्रको धौलागिरि, मालिका र मङ्गला गाउँपालिकामा केन्द्रीय प्रसारण लाइनको विद्युत् सेवा विस्तारमा सहज हुने म्याग्दी वितरण केन्द्रले जनाएको छ ।
