ऊर्जा खबर
काठमाडौं । सुदुरपश्चिम प्रदेशको बझाङस्थित कालंगा नदी बेसिनमा निर्माणाधीन ३८.४६ मेगावाटकाे माथिल्लो कालंगागाड जलविद्युत आयोजना ८५ प्रतिशत पूरा भएको छ । सानीगाड हाइड्रो कम्पनीले निर्माण गरिरहेको आयोजना अन्तिम चरणमा पुगेको हो ।
बाँध क्षेत्रका संरचना निर्माणकाे काम सकिएको आयोजना संयोजक सुनिल रेग्मीले बताए । उनका अनुसार मुख्य सुरुङ पूरा (ब्रेकथु) हुन अब ६५ मिटर बाँकी छ । आयोजनामा अडिटसहित सुरुङकाे लम्बाई ८.१३७ किलोमिटर सुरुङ छ ।
‘आयोजनाको १ हजार १ सय ५० मिटर पेनस्टक पाइपमध्ये ५ सय मिटर राख्ने काम पूरा भएको छ’ उनले ऊर्जाखबरसँग भने ‘बाँकी ६ सय ५० मिटर पाइप लाइनको काम असारभित्र पूरा हुन्छ ।’ उनले विद्युतगृहको सिभिल संरचनाको काम पूरा भई उपकरण जडानको काम धमाधम भइरहेकाे पनि बताए । उपकरण जडानको काम पनि साउनभित्र पूरा गरिसक्ने लक्ष्य छ ।
संरचना निर्माणको काम पूरा गरेर आयोजनाबाट २०७८ भदौ तेस्रो सातादेखि विद्युत उत्पादन गर्ने लक्ष्य छ । आयोजनाबाट २०७७ असारदेखि उत्पादन सुरु गर्ने तालिका भए पनि भौगोलिक विकटता तथा कमजोर भौगोलिक अवस्थाका कारण सुरुङमा देखिएको समस्याले सम्भव नभएकाे कम्पनीले जनाएकाे छ ।
आयोजनाले उत्पादन गर्ने विद्युत दार्चुलास्थित १३२/३३ केभी बलाँच सबस्टेसनमा जोडिनेछ । आयोजना पूरा गर्न ६ अर्ब ९४ करोड रुपैयाँ लागत अनुमान गरिएको छ । आयोजनामा माछापुच्छ्रे बैंकको अगुवाइमा ८ बैंकले ऋण लगानी गरेका छन् ।
कालंगा बेसिनमा माथिल्लो कालंगा गाडसहित १५.३३ मेगावाटको कालंगा गाड र १०.७ मेगावाटको सानीगाड आयोजना निर्माणाधीन छन् । ३ वटै आयोजना एउटै समूहले निर्माण गरिरहेको हो ।
