विद्युत् प्राधिकरणका तीन उपकार्यकारी निर्देशकको जिम्मेवारी हेरफेर

काठमाडौं । नेपाल विद्युत् प्राधिकरणका विभिन्न निर्देशनालयमा कार्यरत तीन उपकार्यकारी निर्देशकको सरुवा तथा जिम्मेवारी हेरफेर गरिएको छ । कार्यकारी निर्देशकस्तरीय शुक्रबार (माघ ७ गते) को निर्णयअनुसार सरुवा गरिएको हो ।

प्राधिकरणले एसियाली विकास बैंक (एडिबी) को लगानीमा परिचालित आयोजना हेर्ने ‘आयोजना व्यवस्थापन निर्देशनालय (पिएमडी)’को जिम्मेवारीमा उपकार्यकारी निर्देशक रामजी भण्डारीलाई तोकिएको छ । उनी यसअघि योजना अनुगमन तथा सूचना प्रणाली निर्देशनालयमा कार्यरत थिए ।

यसैगरी, पिएिमडीमा कार्यरत उपकार्यकारी निर्देशक मनोज सिलवाललाई इन्जिनियरिङ सेवा निर्देशनालयमा सरुवा गरिएको छ । यस्तै, इन्जिनियरिङका प्रमुख रविन्द्रप्रसाद चौधरीलाई योजना अनुगमन निर्देशनालयको जिम्मेवारी तोकिएको छ ।

प्राधिकरणले यसअघि प्रादेशिक कार्यालय प्रमुखहरूको सरुवा गरेको थियो । जसअनुसार प्रदेश १ को प्रदेशिक प्रमुख श्रीरामराज पाण्डेलाई बागमती प्रादेशिक र गण्डकी प्रादेशिकका टेकनाथ तिवारीलाई प्रदेश १ मा सरुवा गरिएको थियो । यस्तै, गण्डकी प्रदेशमा श्रीराम पोखरेललाई जिम्मेवारी तोकिएको छ ।