ऊर्जा खबर
काठमाडौँ । रुकुम पूर्वको विकट भौगोलिक क्षेत्रमा पर्ने भूमे गाउँपालिकाका ५० घरमा राष्ट्रिय प्रसारणको बिजुली पुगेको छ । लुम्बिनी प्रदेश डिभिजन कार्यालय अन्तर्गत रुकुम वितरण केन्द्र (पूर्व) ले हिमाली क्षेत्रमा पर्ने भूमे गाउँपालिका–६ खाम्दाई उक्त गाउँमा विद्युत् पुर्याएको हो ।
१२ किलोमिटर उच्च भोल्टेज प्रसारण लाइन र ४ किलोमिटर ठाडो लो भोल्टेज प्रसारण लाइनमार्फत सो गाउँमा विद्युत् पुर्याइएको वितरण केन्द्रका प्रमुख प्रमोद खनालले बताए ।
रोल्पा जिल्लाको सिमानामा पर्ने उक्त स्थानमा बिजुली नहुँदा स्थानीयले टुकिको भरमा बस्नु परेको थियो । कसैकसैले सोलार जडान गरेका थिए । राष्ट्रिय ग्रिडको बिजुली पुगेपछि यहाँका स्थानीय हर्षित भएका उनले बताए ।
वर्षको ६ महिनासम्म हिउँ पर्ने यस क्षेत्रका कतिपय गाउँमा अझै राष्ट्रिय प्रसारणको बिजुली पुग्न सकेको छैन ।
