ऊर्जा खबर
काठमाडौं । पिपुल्स हाइड्रोपावर कम्पनीले ५७ मेगावाटको हिमचुली दोर्दी जलविद्युत आयोजना निर्माण गर्ने भएको छ । गण्डकी प्रदेशको लमजुङ जिल्लाको दोर्दी खोलामा पहिचान भएको आयोजना अघि बढाउन लागेको हो ।
अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमतिपत्र दिन ३५ दिने सूचना जारी गरेको छ ।
विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्याङकन प्रतिवेदन र आयोजनाको अध्यययन रिपोर्टका आधारमा प्रवद्र्धक कम्पनीलाई उत्पादन अनुमतिपत्र दिने तयारी भइरहेको छ ।
विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय÷सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय÷सुझाव पठाउन सरोकारवालसँग समक्ष आग्रह गरेको छ ।
विभाग वा प्रवद्र्धक कम्पनीको कार्यालयमा प्राप्त हुने गरी राय/सुझाव पठाउन सरोकारवालाले पठाउन सक्ने विभागले जनाएको छ । आयोजनाको मुख्य संरचना इलेप खोलाको बायाँ किनारमा पर्दछ ।
दोर्दी खोदामा बाँध बाँधी ४.२ किलोमिटर लामो सुरुङमार्फत पानीलाई भुमिगत विद्युतगृहमा पुर्याइनेछ । विद्युतगृहमा जडित २ वटा टर्वाइन र २ वटा जेनेरेटर मार्फत विद्युत उत्पादन गरिनेछ ।
आयोजनाबाट उत्पादन भएको विद्युत १३२ केभी डबल सर्किट प्रसारण लाइन मार्फत ६ किलोमिटर दुरीमा रहेको सुपर दोर्दी ख को विद्युत गृहमा पुर्याइनेछ । र त्यहाबाट दुवै आयोेजनाको विद्युत नेपाल विद्युत प्राधिकरणको दोर्दी कोरिडोर हव सबस्टेसन मार्फत राष्ट्रिय प्रसारण लाइनमा प्रवाह गरिनेछ ।
आयोजना पुरा भएपछि वार्षिक ३३५.०४ गिगावाट घण्टा विद्युत उत्पादन हुन्छ । कम्पनीले अहिले ५४ मेगावाटको सुपर दोर्दी ‘ख’ निर्माण गरिरहेको छ ।
