ऊर्जा खबर
काठमाडौं । साझा पावर डेभलपमेन्ट प्रालिले सिन्धुपाल्चोको बलेफी खोलामा निर्माण गर्ने २० मेगावाटको तल्लो बलेफी जलविद्युत आयोजनाको वित्तीय व्यवस्थापन भएको छ । कुमारी बैंक लिमिटेडको अगुवाईमा आज (असार ५ गते) लगानी गर्ने विषयमा सम्झौता भएको हो ।
लगानी सम्बन्धी सम्झौतामा कम्पनीका अध्यक्ष सञ्जिव न्यौपाने र प्रबन्ध सञ्चालक कुवेरमणि नेपाल तथा बैंकका आयोजना लगानी प्रमुख भुषण तण्डुकारले हस्ताक्षर गरेका छन् । ४ अर्ब ४० करोड रुपैयाँ लागत अनुमान गरिएको आयोजनामा ७५ प्रतिशत ऋण र २५ प्रतिशत स्वपुँजी लगानी हुने जनाइएको छ ।
रिडी पावर कम्पनीले लगानी गर्ने गरी निर्माण हुने आयोजनामा कुमारी बैंकले १५० करोड रुपैयाँ लगानी गर्ने प्रतिबद्धता जनाएको छ । काम सुरु भएको दुई वर्षभित्र विद्युत उत्पादन गर्ने लक्ष्य रहेको प्रबन्ध सञ्चालक नेपालले बताए ।
