डडेल्धुराको पूर्वी भेगमा विद्युत् आपूर्ति सहज बनाउन १.५ एमभिएकाे ट्रान्सफर्मर थपियाे

डडेल्धुरा । डडेल्धुराको पूर्वी भागमा पर्ने नवदुर्गा गाँउपालिकामा विद्युत् आपूर्ति सहज बनाउन नयाँ ट्रान्सफर्मर थप गरिएको छ । उक्त पालिकाको वडा नम्बर ३ मा १.५ एमभीए क्षमताको नयाँ ट्रान्सफर्मर थप गरी सञ्चालनमा ल्याउन लागिएको हो । वैशाख ६ गते (शनिबार) उक्त थप गरिएको ट्रान्सफर्मर ‘चार्ज’ गरिएको र ३ दिनपछि सञ्चालनमा ल्याइने नेपाल विद्युत् प्राधिकरण डडेल्धुरा विद्युत् वितरण केन्द्रका प्रमुख रमेश अवस्थीले ऊर्जा खबरलाई बताए ।

जिल्लाको गन्यापधुरा गाँउपालिकामा पहिलेदखि नै चालु रहेका फिडरसँगै थप ३ वटा ११ केभीका फिडरबाट विद्युत् वितरण हुने भएपछि स्थानीय बासिन्दाले सहज रुपमा विद्युत् सेवा पाउन सकेका थिएनन् । नयाँ ट्रान्सफर्मर थपिएपछि यस क्षेत्रको आपूर्तिमा सुधार हुने अपेक्षा गरिएको छ ।

यसैगरी, आगामी एक महिनाभित्र जोगबुढा उपत्यका, आलिताल गाउँपालिका र परशुराम नगरपालिकामा पनि आपूर्ति सहज बनाउन ट्रान्सफर्मर थप गर्ने तयारी भइरहेको उनले बताए ।

केही दिनअघि मात्र नेपाल विद्युत् प्राधिकरणका कार्यकारी निर्देशक हितेन्द्र देव शाक्यले वितरण प्रणालीमा हुने प्राविधिक तथा अप्राविधिक चुहावटलाई घटाउन र थप सुरक्षित, भरपर्दो र ग्राहकमुखी बनाउन निर्देशनसमेत दिएका थिए । पछिल्लो समय प्राधिकरणले विद्युत् आपूर्ति नियमित र गुण्स्तरीय बनाउन प्रसारण पूर्वाधार विस्तारलाई तीव्रता दिएको छ ।