ऊर्जा खबर
काठमाडौँ । हिमशीला पावर कम्पनी लिमिटेडले ४.५ मेगावाटको गशली खोला जलविद्युत् आयोजना निर्माण गर्ने भएको छ । धादिङ जिल्लाको खनियाँबास गाँउपालिका हुँदै बग्ने गशली खोलामा पहिचान भएको आयोजनाको उत्पादन अनुमतिका लागि विद्युत् विकास विभागमा आवेदन दिइएको छ ।
विभागले आयोजनाको नाममा अनुमतिपत्र जारी गर्न अन्तिम चरणको काम गरिरहेको छ । विभागले आयोजना निर्माण गर्दा पर्न सक्ने उल्लेखनिय प्रतिकुल असरबारे सरोकारवालासँग राय/सुझाव मागेको छ । इच्छुक सरोकारवालाले सूचना जारी भएको ३५ दिनभित्र आफ्नो राय/सुझाव विभाग तथा कम्पनीको कार्यालय समक्ष पेस गर्नुपर्नेछ ।
प्रस्तावित आयोजनाको मूल संरचना गशली खोलाको दायाँ किनारमा रहने गरी डिजाइन तयार पारिएको छ । खोलामा बाँध बाँधी दायापट्टि निर्माण हुने इन्टेकबाट पानी फर्काइ सो पानीलाई सुरुङ र पेनस्टक पाइप हुँदै विद्युत्गृहमा पुर्याइनेछ ।
आयोजनामा २२२५ मिटर लामो सुरुङ र १४३८ मिटर लामो पेनस्टक पाइप निर्माण हुनेछ । विद्युत्गृहमा २ वटा टवाईन जडान हुनेछ । आयोजनाको काम आगामी २०८४ बैशाख ३० गतेभित्र सम्पन्न गरी विद्युत् उत्पादन गर्ने कम्पनीको लक्ष्य छ ।
आयोजनाबाट वार्षिक २६.४२ गिगावाट घण्टा विद्युत् उत्पादन हुने अध्ययनले देखाएको छ । आयोजना निर्माण गर्दा भूक्षय, वायु प्रदुषण आदीद्वारा वातावारणीयमा उल्लेखनिय प्रतिकुल असर नपर्ने गरी काम गरिने कम्पनीले जानकारी दिएको छ ।
.jpg)
