भिजन लुम्बिनीले कात्तिक १६ गतेदेखि २१ लाख कित्ता सेयर निष्कासन गर्दै

काठमाडौं । भिजन लुम्बिनी उर्जा कम्पनी लिमिटेडले सर्वसाधारणका लागि करिब २१ लाख कित्ता सेयर निष्कासन गर्ने भएको छ । कम्पनीले कात्तिक १६ गते सेयर निष्कासन गर्न लागेको हो ।

कम्पनीले सर्वसाधारणका लागि छुट्याएको २० लाख ७५ हजार २८५ कित्ता सेयर निष्कासन गर्ने तयारी गरेको कम्पनीले जनाएको छ । स्थानीयलाई सेयर निष्कासन गर्दा बिक्री नभएको ४ लाख ८७ हजार ९१० कित्ता समेत थपेर सर्वसाधारणका लागि २० लाख ७५ हजार २ सय ८५ कित्ता सेयर निष्कासन हुने भएको हो ।

सर्वसाधारणले कात्तिक २० गतेसम्म आवेदन दिन सक्नेछन् । आवेदन दिँदा न्युनतम १० कित्ता र अधिकतम ३ लाख ८० हजार कित्ताको लागि आवेदन दिन सकिने छ  ।

कम्पनीको सेयर निष्कासन गरी बाँडफाँड गर्न मुक्तिनाथ क्यापिटललाई बिक्री प्रबन्धक तोकिएको छ । कम्पनीले कास्कीको माछापुच्छ्रे गाउँपालिकामा २५ मेगावाटको सेती नदी जलविद्युत् आयोजना निर्माण गरिरहेको छ । आयोजनाको काम अन्तिम चरणमा पुगेको छ ।