ऊर्जा खबर
काठमाडौं । इष्टर्न हाइड्रो पावर कम्पनी लिमिटेडको सेयर आवेदन अवधि एक दिन थप भएको छ । कम्पनीको सेयर आवेदन दिने आज कातिक १ गते अन्तिम दिन रहेकोमा सरकारले सार्वजानिक बिदा दिएकोले आवेदन दिने अवधि थप भएकाे हो ।
सय रुपैयाँ अंकित ६ लाख २० हजार कित्ता सेयर आयोजना प्रभावित क्षेत्र भोजपुर जिल्लाका स्थानीय बासिन्दाहरुका लागि निष्कासन गरिएकोमा रितपूर्वक आवेदन दिने आवेदकहरुलाई ५ लाख ६५ हजार ६ सय ९० कित्ता सेयर बाँडफाँड गरेको कमपनीले जनाएको छ । कम्पनीका अनुसार निष्कासन गरिएको सेयरमध्ये ५ प्रतिशत अर्थात ३३ हजार ५ सय कित्ता सेयर सामुहिक लगानी कोषको लागि र २ प्रतिशत अर्थात १३ हजार ४ सय ६ कित्ता सेयर कम्पनीका कर्मचारीका लागि छुट्याएको र बाँकी ६ लाख २३ हजार ३ सय ९८ कित्ता सेयर सर्वसाधारणका लागि निष्कासन गरिएको छ ।
सर्वसधरणले कातिक २ गतेसम्म आवेदन दिन पाउनेछन् । आवेदकले न्यूनतम १० कित्तादेखि अधिकत्तम १ लाख कित्ता सम्म आवेदन दिन पाउनेछन् । कम्पनीको सेयर निष्कासन गरी बाँडफाँड गर्न एनएमबि क्यापिटल लिमिटेडलाई बिक्री प्रबन्धक तोकिएको छ ।
कम्पनीको भोजपुरमा ५ मेगावाटको पिखुवा खोला जलविद्युत आयोजना सञ्चालनमा छ । आयोजनाको प्रतिमेगावाट लागत २६ करोड ११ लाख ७४ हजार ६ सय ९८ रुपैयाँ र आयोजनाको कुल लागत १ अर्ब ३० करोड ५८ लाख ७३ हजार ४ सय ५४ रुपैयाँ रहेको छ ।
