ऊर्जा खबर
काठमाडाैं । ऊर्जा डेभलपर्सको सहायक कम्पनी मेवा डेभलपर्स लिमिटेडले ताप्लेजुङमा निर्माण गरिरहेको मध्यमेवा जलविद्युत आयोजना (७३.५ मेगावाट) को भूमिगत विद्युतगृहको क्याभर्न खन्ने काम सम्पन्न भएको छ । ६१.५ मिटर लम्बाई, १५ मिटर चौडाई, २७ मिटर उचाईको उक्त क्याभर्न भदौ १ गते खनेर सकिएको हो; जुन ९ महिनामै पूरा भएको कम्पनीले जानकारी दिएको छ ।
क्याभर्नमा विद्युतगृह निर्माण गरी जर्मन प्रविधिबाट निर्माण गरिएका २४.५ मेगावाटका तीन वटा टर्बाइनहरू जडान गरिनेछ । साथै, आयोजनाका सिभिल, हाइड्रो मेकानिकल, इलेक्ट्रो मेकानिकल, प्रसारण लाइन लगायत काम समेत द्रुत गतिमा भइरहेको पनि कम्पनीले जनाएको छ ।
सुख्खायाममा दैनिक ६ घन्टा ७३.५ मेगावाट नै विद्युत उत्पादन हुने आंशिक जलाशय (पिकिङ आरओआर) आयोजनाको निर्माण सम्पन्नपछि वार्षिक ४३६.०८ गिगावाट–घन्टा विद्युत उत्पादन हुने अध्ययनले देखाएको छ ।
भूमिगत विद्युतगृहको क्याभर्न निर्माण सम्पन्न भएको अवसरमा आयोजित कार्यक्रममा बोल्दै कम्पनीका अध्यक्ष विजयबहादुर राजभण्डारीले क्याभर्न खन्ने काममा योगदान पुर्याउने डेभलपर्स, ठेकेदार, परामर्शदाता, कम्पनीका सम्पूर्ण कर्मचारीहरू धन्यवाद दिए । यस्तै, कम्पनीका प्रबन्ध सञ्चालक भानु पोखरेलले भूमिगत विद्युतगृहको क्याभर्न खन्ने सकिएको हुँदा आयोजनाका बाँकी कामहरू निर्धारित समयमै सम्पन्न गर्न सकिने बताए ।
आयोजनाबाट विद्युतको व्यापारिक उत्पादन मिति (आरसिओडी) मार्च सने २०२४ रहेको हुँदा उक्त अवधिभित्रै सबै काम पूरा गर्ने विश्वास लिइएको छ । मेवा डेभलपर्सले आगामी वर्ष साधारण सेयर निष्कासन गर्ने तयारी समेत गरिरहेको छ ।
