ऊर्जा खबर
काठमाडौं । नेपाल विद्युत प्राधिकरण भरतपुर वितरण केन्द्रले विद्युत महसुलकाउन्टर खुल्ला गरेको छ । करिब डेढ महिनादेखि बन्द रहेको विद्युत महसुल संकलन शुक्रबार (आज) बाट सुचारु गरिएको हो ।
कोरोना (कोभिड–१९) संक्रमणको जोखिम उच्च भएपछि बन्द भएको काउन्टर सुचारु गर्ने निर्णय भएको वितरण केन्द्र प्रमुख राजीव सिंहले बताए । ‘आज बिहान ८ बजेदेखि १२ बजेसम्म काउन्टर खुल्ला गरिएको थियो’ उनले ऊर्जाखबरसँग भने, ‘केही औद्योगिक ग्राहक आएर महसुल पनि बुझाए ।’
आइतबारदेखि बिहीबारसम्म दैनिक ८ बजेदेखि २ बजेसम्म काउन्टर खुल्ला रहने पनि सिहंले बताए । शुक्रबार भने ८ बजेदेखि १२ बजेसम्म मात्र खुल्ला रहनेछ ।
केन्द्रले मिटर रिडिङ कार्य पनि गत १ गतेदेखि सुचारु गरेको छ । करिब १ महिनादेखि बन्द रहेको मिटर रिडिङ तथा नयाँ मिटर जडान कार्य मंगलबारबाट सुचारु गरिएको हो । लामो समय मिटर रिडिङ नहुँदा ग्राहकले विद्युत महसुल तिर्न नसकेकोले स्वास्थ्य सावधानीका उपायको पालना गर्दै मिटर रिडिङ कार्य पनि सुरु गरिएको छ ।
