ऊर्जा खबर
काठमाडौँ । स्वतन्त्र ऊर्जा उत्पादकहरूको संस्था नेपाल, (इपान) को आगामी निर्वाचनदेखि ‘इ–भोटिङ’ अर्थात् अनलाइन प्रणालीबाट मतदान गरिने भएको छ । संस्थाका सल्लाहाकारको सुझाव कार्यान्वयन तथा समयानुसारको प्राविधिक प्रणाली आत्मसात् गर्दै यो विधि अपनाइने भएको हो ।
नेपाली राजनीतिमा दशकौँदेखि यो प्रणाली अवलम्बन गर्ने बहस एवम् छलफल हुँदै आए पनि निजी ऊर्जा उद्यमीहरूले यसलाई कार्यान्वयनमा लैजाने प्रतिबद्धता जनाएका छन् । इपानले यो विधि कार्यान्वयन गरेमा संस्था रूपान्तरणको बलियो सन्देश त जाने नै छ, साथै मतदान तथा कार्यसमिति चयन प्रक्रियामा देखिने विवादका आवाज पनि मत्थर हुने देखिन्छ ।
यसैगरी, ‘डिजिटल’ भोटिङ प्रक्रिया कार्यान्वयन गर्ने सम्भवतः इपान पहिलो निजी संस्था पनि बन्ने छ । यसले अन्य संघ–संस्था तथा निकायलाई पनि त्यसतर्फ पाइला चाल्ने बाटो निर्माण हुने अपेक्षा गर्न सकिन्छ ।
इपान सल्लाहकार तथा एमभी दुगड समूहका अध्यक्ष मोतीलाल दुगडले इपानले दशकौँदेखिका विवाद अन्त्य गर्दै आधुनिक रूपान्तरणको चरणमा प्रवेश गर्ने विधिमध्ये पहिलो ‘इ–भोटिङ’ विधि अपनाउनुपर्ने सुझाव दिएका थिए । अन्य सल्लाहकारहरूले समेत यसमा जोड दिँदै आएका थिए ।
विद्यमान इपान विद्यानअनुसार वरिष्ठ उपाध्यक्ष रहेका डाँगी स्वतः अध्यक्ष चयन भएका थिए । आफू चयन भएलगत्तै डाँगीले आफूले ३ वर्षभित्र गर्ने कार्यहरूमध्ये ‘इ–भोटिङ’लाई प्राथमिकता दिँदै कार्यान्वयन गर्ने प्रतिबद्धता समेत जनाएका थिए । उनले मञ्चबाट सल्लाहकार दुगडले यो विधि लागु गर्न विशेष सुझाव दिएको हुँदा ‘जसरी पनि कार्यान्वयन हुने’ बताएका थिए ।
