एनएमबी बैंकको साढे ३ अर्बको ‘ऊर्जा ऋणपत्र’ मा आवेदन दिने समयअवधि सकिँदै

काठमाडौं । एनएमबी बैंकको साढे ३ अर्ब रुपैयाँको ऋणपत्रमा आवेदन दिने आज अन्तिम दिन हो । आफ्नो लगानीलाई नवीकरणीय ऊर्जा क्षेत्रमा लक्षित गर्दै आएको बैंकले यसलाई अझ व्यापकरूपमा प्रवर्द्धन गर्न गत बैशाख २१ गतेदेखि निष्कासन गरेको १५ वर्षे ‘ऊर्जा ऋणपत्र’ मा आवेदन दिने समय आज साँझ ५ बजेबाट सकिन लागेको हो ।

ऊर्जा विकासको सरकारी लक्ष्य हासिल गर्न सहयोगी हुने उदेश्यअनुसार बैंककले एक हजार रुपैयाँ अंकित ३ अर्ब ५० करोड रुपैयाँ बराबरको ३५ लाख कित्ता ऋणपत्र जारी गरेको छ ।

ऊर्जा ऋणपत्र जारी भई संकलन भएको रकम ऊर्जा विकासमा लगानी गरिनेछ । ऊर्जा क्षेत्रमा लगानीको अनुभव हासिल गरेका वाणिज्य बैंकले ऊर्जा ऋणपत्र जारी गर्ने व्यवस्था अनुसार बैंकले ऋणपत्र जारी गरेको छ ।

कूल जारी ऋणपत्रमध्ये ६० प्रतिशत अर्थात २१ लाख कित्ता बैंक आफैले अन्य संघ संस्थालाई बिक्री गर्नेछ । बाँकी १४ लाख कित्ता मध्ये ५ प्रतिशत अर्थात ७० हजार कित्ता म्युचुअल फन्डलाई छुट्याइएको छ । बाँकी रहेको १३ लाख ३० हजार कित्ता सर्वसाधारणका लागि बिक्री खुल्ला गरिएको छ ।

ऋणपत्रमा लगानीकर्ताहरूले वार्षिक ४ प्रतिशत व्याजदर प्राप्त गर्नेछन् । इच्छुक लगानीकर्ता वा ऋणपत्र लगानीकर्ताले न्यूनतम २५ कित्तादेखि अधिकतम १४ लाख कित्तासम्म आवेदन दिन सक्नेछन् ।

बैंकले हालसम्म ४२ वटा जलविद्युत आयोजनामा लगानी सम्झौता गरिसकेको छ । सम्झौता गरी केही रकम कर्जा प्रवाह गरिसकेको छ भने बाँकी रकम प्रवाह गर्ने प्रक्रियामा रहेको बैंकले जनाएको छ । साथै, थप ५ आयोजनामा कर्जा लगानी गर्न सम्झौताको प्रक्रियामा रहेको छ । जलविद्युत सँगै २६ वटा नविकरणीय ऊर्जामा समेत लगानी गरेको छ ।