ऊर्जा खबर
काठमाडौं । देशका ७४ जिल्लाका ९० प्रतिशतको घरमा राष्ट्रिय प्रसारण प्रणालीकाे विद्युत पहुँच पुगेको छ । नेपाल विद्युत प्राधिकरण र सामुदायिक संस्थामार्फत विद्युतीकरण गरी करिब ५१ लाख घरधुरीमा राष्ट्रिय प्रसारण प्रणालीकाे विद्युत पहुँच पुर्याइएकाे हाे ।
नेपाल विद्युत प्राधिकरणले मंगलबार ३६औं वार्षिकाेत्सवका अवसरमा गत साउन १८ गते जुम्लामा राष्ट्रिय प्रसारण प्रणालीको विद्युत जोडिएसँगै ७४ वटा जिल्लामा विद्युत सेवा विस्तार भएको जनाएकाे छ । प्राधिकरणकाे विद्युत सेवा लिने ग्राहक ४५ लाख ३० हजार पुगेका छन् । बाँकी साढे ५ लाख जनतामा सामुदायिक संस्थामार्फत विद्युतीकरण गरिएकाे हाे ।
अघिल्लो आर्थिक वर्ष २०७६/७७ को तुलनामा गत आर्थिक वर्ष (२०७७/७८) मा ग्राहककाे संख्या ७.३७ प्रतिशत बढेकाे पनि प्राधिकरणले जनाएकाे छ । अघिल्लो वर्ष प्राधिकरणकाे विद्युत सेवा लिने ग्राहककाे संख्या ४२ लाख २२ हजार थियो ।
प्राधिकरणले कोरोना महामारीका बाबजुद गत आर्थिक वर्षसम्ममा जम्मा ३२ जिल्लामा पूर्ण विद्युतीकरण गरेकाे छ । कर्णाली प्रदेशका कालीकोट र जुम्लामा समेत राष्ट्रिय प्रसारण प्रणालीबाट विद्युत पुर्याइएको छ ।
सबैभन्दा धेरै प्रदेश नम्बर २ मा ९९.०५ प्रतिशत जनताको घरमा विद्युत पहुँच पुगेको छ । सबैभन्दा थोरै कर्णालीमा ३४.७५ प्रतिशतको घरमा विद्युत पहुँच पुगेको छ । विद्युत सेवा नपुगेका बाँकी, डोल्पा, हुम्ला र मुगु जिल्लामा पनि चालु आर्थिक वर्ष २०७८/७९ भित्र विद्युत सेवा पुर्याउने प्राधिकरणकाे लक्ष्य छ । अगामी २ वर्षभित्र शतप्रतिशत विद्युतीकरण सम्पन्न गर्ने प्राधिकरणकाे याेजना छ ।
