ऊर्जा खबर
काठमाडौँ । विद्युत् नियमन आयोगको अध्यक्षका लागि आवेदन दिएका उम्मेदवारहरूमध्ये ७ जनाको नाम 'सर्ट लिस्ट'मा परेको छ । 'विद्युत् नियमन आयोगका अध्यक्ष र सदस्य नियुक्ति सिफारिस समिति' ले बुधबार उक्त जानकारी दिएको हो ।
छनोटमा परेका उम्मेदवारहरूको व्यावसायिक कार्ययोजना प्रस्तुतीकरण तथा अन्तर्वार्ता यही असार ६ गते शनिबार हुने भएको छ । समितिले गत जेठ ७ गते प्रकाशन गरेको सूचना बमोजिम आवश्यक न्यूनतम शैक्षिक योग्यता र कार्यअनुभव पूरा गरेका तथा व्यावसायिक कार्ययोजनाको मूल्याङ्कनमा ५० प्रतिशत वा सोभन्दा बढी अङ्क प्राप्त गरेका उम्मेदवार छनोट गरेको जनाइएको छ ।
सिफारिस समितिले उम्मेदवारको दुई सत्रमा विभाजन गरेर प्रस्तुतीकरण तथा अन्तर्वार्ता लिने व्यवस्था मिलाएको छ । पहिलो चरण असार ६ गते शनिबार बिहान ९:०० बजेदेखि सुरु हुनेछ, जसमा केशवध्वज अधिकारी (ललितपुर), डा. रामप्रसाद धिताल (सिन्धुपाल्चोक), मधुप्रसाद भेटुवाल (काठमाडौँ) र मोतीबहादुर कुँवर (काठमाडौँ) छन् । यसैगरी, सोही दिन दिउँसो २:०० बजेदेखि सुरु हुने दोस्रो चरणमा डा. मधुसुधन अधिकारी (काठमाडौँ), डा. भोलानाथ शर्मा घिमिरे (गोरखा) र नारायणप्रसाद सापकोटा (चितवन) रहेका छन् ।
आवेदन दिनेहरूमध्ये रुद्रप्रसाद गौतम, शान्तिकला सुबेदी र रामेश्वरप्रसाद कलवार प्रतिस्पर्धाबाट बाहिरिएका छन् । छनोटमा परेका उम्मेदवारले आफ्नो व्यावसायिक कार्ययोजना प्रस्तुतीकरणका लागि अधिकतम १५ मिनेटको समय पाउने उल्लेख छ ।
