गण्डकी प्रदेशको जलविद्युतमा लगानी गर्न ३५ करोड रुपैयाँ विनियोजन

काठमाडौं । गण्डकी प्रदेश सरकारले जलविद्युत आयोजनामा लगानी गर्न ३५ करोड रुपैयाँ बजेट छुट्याएको छ । माननीय अर्थ मन्त्री रामजी प्रसाद बराल (जीवन) ले आर्थिक वर्ष २०७९/८० को बजेट प्रस्तुत गर्दै प्रदेश अन्तर्गतका आयोजनामा लगानी गर्न सो रकम विनियोजन गरेका हुन् ।

प्रदेश अन्तर्गतका विभिन्न जिल्लामा पहिचान भएको आयोजना निर्माण गर्न ३५ करोड रुपैयाँ बजेट विनियोजन गरिएको छ । यस्तै, नेपाल सरकार र प्रदेश सरकारको लगानी साझेदारीमा जलाशययुक्त बुढीगण्डकी र उत्तरगंगा जलविद्युत आयोजनाको यथासक्य छिटो निर्माण सुरु गर्न आवश्यक पहल गरिनेछ ।

आगामी आवभित्रमा ‘उज्यालो गण्डकी प्रदेश’ कार्यक्रम सम्पन्न गरिनेछ । लघु जलविद्युत आयोजनाबाट उत्पादन भएको विद्युतलाई राष्ट्रिय लाइनमा आवद्ध गरी केन्द्रिय लाइनमा आवद्ध हुन नसकेको स्थानमा सौर्य र वैकल्पिक ऊर्जामार्फत विद्युतीकरण गर्नका लागि आवश्यक बजेट छुट्याइएको छ ।

देशमा बढ्दै गएको विद्युत उत्पादन खपतलाई बढाउन विद्युतीय सवारी साधनलाई प्रोत्साहित गर्न प्रदेशका विभिन्न स्थानमा चार्जिङ स्टेसन निर्माण गरिने बजेटमा उल्लेख छ ।

यस्तै, विद्यतमान लिफ्टिङ्ग खानेपानी आयोजनामा लाग्ने महसुल शत प्रतिशत सहुलियत उपलब्ध गराउने व्यवस्था गरेकोले यसका लागि ५ करोड रुपैयाँ बजेट छुट्याएको छ । यस्तै, सरकारले सञ्चालित सिँचाइ आयोजनाको निरन्तरता एंव नयाँ निर्माण हुने सिँचाइ आयोजनाका लागि १ अर्ब ४५ करोड रुपैयाँ छुट्याएको छ ।