हनुमान हाइड्रोले ७ अर्ब लगानीमा ४३ मेगावाटको छिलुङ्ग खोला बनाउँदै

काठमाडौं । हनुमान हाइड्रो पावर कम्पनीले करिब ७ अर्ब रुपैयाँ लगानीमा ४३.२ मेगावाटको छिलुङ्ग खोला जलविद्युत आयोजना निर्माण गर्ने भएको छ । गोरखाको चुमनुब्री गाउँपालिका–३ मा रहेको छिलुङ्ग खोलामा आयोजना निर्माण गर्न लागेको हो ।

प्रस्तावित आयोजनाको सम्भाव्यता अध्ययन पूरा गरी वातावरणीय प्रभाव मूल्यांकन (इआइए) प्रतिवेदन समेत तयार पारेर स्वीकृतिका लागि वन तथा वातावरण मन्त्रालय पेस गरेको कम्पनीले जनाएको छ ।

आयोजनाको बाँध सिर्दिबास गाउँ र विद्युतगृह चिलुन गाउँ र चुमचेट गाउँ नजिकै रहनेगरी डिजाइन तयार पारिएको छ । आयोजनामा ८८४५ मिटर हेडरेस पाइप र १९३८ मिटर पेनस्टक पाइप रहनेछ । विद्युतगृह भुमिगत हुनेछ ।

आयोजना निर्माण सम्पन्न गर्न ७ अर्ब १२ करोड ८० लाख रुपैयाँ लागत अनुमान गरिएको छ । आयोजनाको वार्षिक ऊर्जा उत्पादन २५८.५१ गिगावाट उत्पादन हुनेछ । वर्षायाममा १७८.६९ गिगावाट आवर र सुक्खायाममा ७९.८३ गिगावाट आवर उत्पादन हुनेछ ।

उत्पादीत विद्युत १३२ केभी सिंगल सर्किट लाइन मार्फत २ किलोमीटर दुरीमा रहेको नेपाल विद्युत प्राधिकरणद्धारा प्रस्तावित फिलिम सबस्टेसन सबस्टेसनमा जोडिनेछ ।