ऊर्जा खबर
काठमाडौं । बजाङको कालंगा नदीमा बाघथला हाइड्रो पावर कम्पनीले ८ मेगावाटको तल्लो कालंगा गाड जलविदुत आयोजना निर्माण गर्ने तयारी गरिरहेको छ ।
निर्माण सम्पन्न १५.३३ मेगावाटको कालंगा गाड जलविद्युत आयोजना नजिकै पहिचान भएको तल्लाे कालंगा गाड आयोजनाको निर्माणको तयारी गरिएको कम्पनीका प्रमुख कार्यकारी अधिकृत पुष्प चित्रकारले बताए ।
‘आयोजना निर्माण सुरु अघिको काम भइरहेको छ’, उनले ऊर्जाखबरसँग भने, ‘अहिले नेपाल विद्युत प्राधिकरणसँग विद्युत खरिद सम्झौता (पीपीए) को तयारी भइरहेको छ ।’
यही नदीमा ६४ मेगावाटको २ जलविद्युत आयोजना निर्माणाधीन छन् भने एक आयोजनाको निर्माण पूरा गरी परीक्षण समेत सकिएको छ । कालंगा हाइड्रो इनर्जी कम्पनीले कालंगा गाडको निर्माण पूरा गरी २०७९ असारमै परीक्षण समेत पूरा गरीसकेको हाे ।
आयोजनाको काम पूरा भएपनि कम्पनी आफैले निर्माण गरिरहेको विद्युत जोडिने लाइन पूरा नहुँदा विद्युत प्रणालीमा जोडिन सकेको छैन् । अहिले भने प्रसारण लाइनको काम पनि अन्तिम चरण पुर्याएको चित्रकारले बताए । आगामी एक महिनाभित्र लाइनको काम पूरा हुनेछ ।
यस्तै, याे बेसीनमा सानीगाड हाइड्रो कम्पनीले निर्माण गरीरहेकाे ३८.४६ मेगावाटको माथिल्लो कालंगा गाडको काम पनि अन्तिम चरणमा पुगेकोले कात्तिकभित्र पूरा गरी परीक्षण गर्ने लक्ष्य रहेको छ । १०.७० मेगावाटको सानिगाडको काम भने आगामी माघभित्र पूरा हुने प्रवर्द्धक बुंगल हाइड्रो कम्पनीले जनाएको छ ।
यी सबै आयोजनाको विद्युत ३९ किलोमिटर दुरीमा रहेको बलाँच सबस्टेसनमा जोडिनेछ । सबस्टेसनसम्मको आवश्यक लाइन निर्माणको काम पनि अन्तिम चरणमा पुगेको छ । यी सबै आयोजना निर्माण पूरा भएपछि सुदुरपश्चिम क्षेत्रमा विद्युत आपूर्ति गरिनेछ । अहिले यो क्षेत्रमा भारतबाट विद्युत आयात गरेर सेवा प्रवाह भइरहेको छ ।
