ऊर्जा खबर
काठमाडौँ । स्वतन्त्र ऊर्जा उत्पादकहरूको संस्था, नेपाल (इपान) ले उपप्रधान एवं गृह मन्त्री रवि लामिछानेलाई भेटेर जलविद्युत् लगायत ऊर्जा आयोजनाको लागि छुट्टै 'ऊर्जा सुरक्षा नीति' बनाउन माग गरेको छ ।
बुधबार गृह मन्त्रालयमा भएको भेटमा इपान अध्यक्ष गणेश कार्कीले ऊर्जासँग सम्बन्धित आयोजनामा धेरै खालका सुरक्षा जोखिम रहेको भन्दै यसको समाधानको लागि उक्त नीति बनाएर लागू गर्न माग गरेका हुन् ।
कार्कीले प्रसारण लाइन निर्माणको अवरोधले जलविद्युत् आयोजनाहरू प्रतक्षरूपमा प्रभावित भइरहेको भन्दै यसमा हुने अवरोध अन्त्य गर्न पनि गृह मन्त्रीसँग आग्रह गरे । भेटमा लामिछानेले ऊर्जा सुरक्षा नीति बनाएर ऊर्जा व्यवसायीलाई सुरक्षा दिने विषयमा आफू प्रतिबद्ध रहेको बताए ।
मन्त्री लामिछानेले ऊर्जा आयोजना निर्माण गर्दा जग्गा प्राप्ति र अधिग्रहणमा गृहको साथ चाहिएमा मन्त्रालयले सधैँ सहयोग गर्ने पनि बनाए । उनले ऊर्जा व्यवसायीमाथि चन्दा आतंक भएमा खुलेर भन्न आग्रह गरेका छन् । मन्त्रालयमा भएको भेटमा अध्यक्ष कार्की सहित उपाध्यक्ष रामप्रसाद आचार्य र महासचिव बलराम खतिवडा सहभागी थिए ।
