ऊर्जा खबर
काठमाडौँ । ताप्लेजुङ जिल्लाको सिरजंगा गाँउपालिकामा निर्माणाधीन १२ मेगावाटको सुपर काबेली जलविद्युत् आयोजनाको करिब २ किलोमिटर मुख्य सुरुङ खन्ने काम पूरा भएको छ । हिल्टन हाइड्रो इनर्जी लिमिटेडले निर्माण गरिरहेको आयोजनाको सुरुङ बुधबार वारपार भएको हो ।
उक्त गाँउपालिकाका वडा ६, ७ र ८ नम्बरमा निर्माण भइरहेको आयोजनाको विद्युत्गृहमा ६.२५ मेगावाटका २ वटा युनिट जडान गरिने छ । आयोजनाले वार्षिक औसत ७४.३३१ गिगावाट घन्टा (७ करोड ४३ लाख ३१ हजार युनिट) विद्युत् उत्पादन गर्ने अध्ययनले देखाएको छ ।
आयोजनाबाट उत्पादित विद्युत् १८ किलोमिटर दूरीमा अवस्थित नेपाल विद्युत् प्राधिकरणको अमरपुर सबस्टेसनमा जोडिने छ । सुरुमा २ अर्ब १६ करोड रुपैयाँ लागत अनुमान गरिए पनि निर्माण अवधि लम्बिँदा २ अर्ब १८ करोड पुग्ने आयोजनाले जनाएको छ ।
.jpg)
