निफ्राकाे ५ अर्बको ७ बर्षे ‘ऊर्जा ऋणपत्र’ जारी

काठमाडौं । नेपाल इन्फ्रास्ट्रक्चर बैंक लिमिटेड (निफ्रा) ऊर्जा क्षेत्रमा लगानी गर्न ५ अर्ब रुपैयाँ बराबरको ‘ऊर्जा ऋणपत्र’ जारी गरेको छ । बैंकले ७ वर्षका लागि बिहीबार (मंसिर २९ गते) देखि ऋणपत्र जारी गरेको हो ।

५ अर्ब रुपैयाँ बराबरको ५ लाख कित्ता ऊर्जा ऋणपत्र जारी गरेको बैंकले जनाएको छ । र्बैकका अनुसार ३ लाख कित्ता निजी तबरबाट बिक्री हुनेछ भने २ लाख कित्ता सर्वसाधारणको लागि निष्कासन गरिएको छ ।

इच्छुकले न्यूनत्तम २५ देखि अधिकत्तम १ लाख कित्ता सम्मका लागि आवेदन दिन सक्नेछन् । आवेदकले छिटोमा पुस ४ गतेसम्म र ढिलोमा १४ गतेसम्म आवेदन दिन सक्ने बैंकले जनाएको छ ।

७ वर्षे अवधिको यस ऋणपत्रमा बैंकले ७ प्रतिशत ब्यान प्रदान गर्नेछ । ऋणपत्र निष्कासनको लागि एनआइबिएल एस क्यापिटल लिमिटेडलाई बिक्री प्रबन्धक तोकिएको छ ।

नेपाल राष्ट्र बैंककले आर्थिक वर्ष ७८/७९ को मौद्रिक नीतिको अर्थवार्षिक समिक्षा मार्फत पूर्वाधार विकास बैंकले समेत ऊर्जा ऋणपत्र जारी गर्नसक्ने व्यवस्था गरेको थियो । सोही अनुसार बैंकले ऊर्जा ऋणपत्र निष्कासन गरेको हो । 

बैंकले ऊर्जा, सहरी विकास, यातायात लगायत पूर्वाधार परियोजनामा लगानी गर्दै आएको छ । बैंकले स्थापनाको छाटो अवधिमा २२ वटा पूर्वाधार परियोजनामा करिब २७.५० अर्ब रुपैयाँ लगानी गर्ने प्रतिबद्धता जनाएको छ ।