ऊर्जा खबर
काठमाडौं । मेन्छियाम हाइड्रो पावर लिमिटेडले फागुन १० गतेदेखि सेयर निष्कासन गर्ने भएको छ । कम्पनीले प्रभावित स्थानीय र वैदेशिक रोजगारीमा गएका नेपाली नागरिकका लागि छुट्याएको सेयर निष्कासन गर्न लागेको हो ।
जारी पूँजीको ५४ करोड २५ लाख ८३ हजार ३ सय रुपैयाँको १० प्रतिशत अर्थात ५ करोड ४२ लाख ५८ हजार ३ सय रुपैयाँ रकम बराबरको सय रुपैयाँ अंकित ५ लाख ४२ हजार ५ सय ८३ कित्ता साधारण सेयर निष्कासन गर्न लागेको कम्पनीले जनाएको छ । कम्पनीका अनुसार २ लाख ७१ हजार २ सय ९२ कित्ता सेयर अत्ति प्रभावित क्षेत्र संखुवसभा जिल्लाका (साविक सिद्धकाली, सिद्धपोखरी र मावादीन गाविस) का स्थानीय बासिन्दाका लागि र २ लाख ७१ हजार २ सय ९१ कित्ता सेयर आयोजनाबाट प्रभावित क्षेत्र संखुवासभा जिल्लाका स्थानीय बासिन्दाका लागि निष्कासन गरिनेछ ।
यस्तै, वैदेशिक रोजगारीमा गएका नेपाली नागरिकका लागि सर्वसाधारणमा निष्कासन हुने सेयरको १० प्रतिशत अर्थात १० लाख ८५ हजार १ सय ६७ कित्ता सेयर मध्येको १ लाख ८ हजार ५ सय १७ कित्ता सेयर निष्कासन गर्न लागेको हो । कम्पनीले पहिलो चरणमा प्रभावित स्थानीय र वैदेशिक रोजगारीमा गएका नेपाली नागरिकका लागि सेयर निष्कासन गरी बाँडफाँड गरी सकेपछि दोस्रो चरणमा सर्वसाधारणका लागि निष्कासन गरिनेछ ।
प्रभावित स्थानीय र वैदेशिक रोजगारीमा गएका नेपाली नागरिकले न्यूनत्तम १० कित्तादेखि अभिकत्तम १० हजार कित्तासम्म आवेदन दिन पाउनेछन् । स्थानीयले छिटोमा फागुन २५ गतेसम्म र ढिलोमा चैत १० गतेसम्म आवेदन दिन पाउनेछन् भने वैदेशिक रोजगारीमा गएका नेपाली नागरिककले फागुन २५ गतेसम्म आवेदन दिन पाउनेछन् ।
कम्पनीको सेयर निष्कासन गरी बाँडफाँड गर्न एन आई सी एशिया क्यापिटल लिमिटेडलाई बिक्री प्रबन्धक तोकिएको छ । कम्पनीको संखुवासभामा ४.७२ मेगावाटको माथिल्लो पिलुवा खोला–२ स्मल जलविद्युत आयोजना निर्माणाधनी छ ।
