ऊर्जा खबर
काठमाडौं । इष्टर्न हाइड्रो पावर लिमिटेडको सेयर आवेदन खुल्ला भएको छ । कम्पनीको भोजपुरमा निर्माण सम्पन्न ५ मेगावाटको पिखुवा खोला जलविद्युत आयोजनाको सर्वसाधारणका लागि छुट्याएको साधारण सेयर निष्कासन भएको हो ।
कम्पनीले स्थानीयका लागि निष्कासन गरी बिक्री नभई बाँकी रहेको ५० हजार ३ सय १० कित्ता सेयर ६ लाख २० हजार कित्तामा थप गरी ६ लाख ७० हजार ३ सय १० कित्ता सेयर निष्कासन गरेको छ ।
सय रुपैयाँ अंकित ६ लाख २० हजार कित्ता सेयर आयोजना प्रभावित क्षेत्र भोजपुर जिल्लाका स्थानीय बासिन्दाहरूका लागि निष्कासन गरिएकोमा रितपुर्वक आवेदन दिने आवेदकहरूलाई ५ लाख ६५ हजार ६ सय ९० कित्ता सेयर बाँडफाँड गरेको कम्पनीले जनाएको छ ।
अहिले निष्कासन भएकाे सेयरमध्ये ५ प्रतिशत अर्थात ३३ हजार ५ सय १५ कित्ता सेयर सामूहिक लगानी कोषको लागि सुरक्षित गरिएको र २ प्रतिशत हुन आउने अर्थात १३ हजार ४ सय ६ कित्ता सेयर कम्पनीका कर्मचारीका लागि छुट्याएको र बाँकी ६ लाख २३ हजार ३ सय ८९ कित्ता सेयर सर्वसाधारका लागि निष्कासन गरिएको छ ।
सर्वसाधारणले छिटोमा कात्तिक १ गतेसम्म र ढिलोमा कात्तिक १४ गतेसम्म आवेदन दिन सक्नेछन् । आवेदकले न्यूनतम १० कित्तादेखि अधिकत्तम १ लाख कित्तासम्म आवेदन दिन पाउनेछन् ।
कम्पनीको सेयर निष्कासन गरी बाँडफाँड गर्न एनएमबि क्यापिटल लिमिटेडलाई बिक्री प्रबन्धक तोकिएको छ । आयोजनाको प्रतिमेगावाट लागत २६ करोड ११ लाख ७४ हजार ६ सय ९८ रुपैयाँ र आयोजनाको कुल लागत १ अर्ब ३० करोड ५८ लाख ७३ हजार ४ सय ५४ रुपैयाँ रहेको छ ।
