ऊर्जा खबर
काठमाडौं । एक्सपर्ट हाइड्रो इन्भेस्टमेन्ट प्राइभेट लिमिटेडले ४४.५२ मेगावाटको सानीभेरी जलविद्युत आयोजना निर्माण गर्ने भएको छ । कम्पनीले रुकुम पूर्व जिल्लाको पुथा उत्तरगंगा गाउँपालिका वडा नम्बर ७, १४ (साविक जाङ्ग गाविस वडा नम्बर १ र २, राङ्सी गाविस वडा नम्बर ८) र सिस्ने गाउँपालिका वडा नम्बर २ (साबिक पवाङ गाविस वडा नम्बर २,३,८ र ९) मा उक्त मेगावाटको आयोजना निर्माण गर्न लागको हो ।
विद्युत विकास विभागका अनुसार अनुमतिपत्र दिन ३५ दिने सूचना जारी गरेको छ । अनुमतिपत्र दिनु अघि सानी भेरी जलविद्युत आयोजना निर्माण तथा सञ्चलन गर्दा पर्न सक्ने प्रतिकुल असरबारे सम्बन्धित सरोकारवालासँग राय सुझाव माग गरेको छ ।
यो आयोजना रन अफ रिभर प्रकारको हुनेछ । यसको डिजाइन बहाव ३६.८ घन मिटर प्रति सेकेन्ड र कुल हेड १४४.७५ मिटर हुनेछ ।
यो आयोजनाबाट वार्षिक सरदर २८३.३७ गिगावाट घन्टा विद्युतीय ऊर्जा उत्पादन हुनेछ । आयोजनाको मुख्य संरचनाहरु सानीभेरी नदीको बायाँ किनारामा पर्दछन् । आयोजनाको हेडवक्र्स पुथा गाउँपालिकाको वडा नम्बर ७ र १४ मा पर्दछ ।
विद्युत उत्पादनको लागि सानीभेरी नदीको पानी प्रयोग गर्नेछ । उक्त पानीलाई जम्मा गरी ४१३७ मिटर लम्बाइ र ५.४५ मिटर व्यास भएको हेडरेस टनेल मार्फत पानी लगिनेछ । सोही पानीलाई स्टील पेनस्टक पाइबाट ३५ मिटर लम्बाइ १८ मिटर चौडाइ र २६ मिटर उचाइको विद्युत गृहमा पुर्याइनेछ। विद्युत उत्पादनपछि ५० मिटर लम्बाइको टेलरेस क्यानल मार्फत सोही सानीभेरी नदीमा पानी छोडिनेछ ।
उत्पादित विद्युतलाई विद्युत गृहको स्वीचयार्डदेखि २० किलोमिटर लामो प्रसारण लाइन मार्फत प्रस्तावित बाँफीकोट सबस्टेसनबाट राष्ट्रिय प्रसारण लाइनमा जोडिनेछ । यो आयोजनाबाट साढे ३ वर्षमा विद्युत उत्पादन गर्ने लक्ष्य राखिएको विभागले जनाएको छ ।
