ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्री विराजभक्त श्रेष्ठले बुधबार मन्त्रीस्तरीय निर्णयमार्फत नेपाल विद्युत् प्राधिकरणको सञ्चालक समितिमा दुई नयाँ सञ्चालक नियुक्त गरेका छन् । आगामी चार वर्षका लागि नियुक्त भएका सञ्चालकमा निजी क्षेत्रको प्रतिनिधित्व गर्दै काठमाडौं महानगरपालिका–१५ निवासी अंशुकिरण शाही र उपभोक्ताको तर्फबाट नागार्जुन नगरपालिका–५ निवासी कृष्ण बसेल रहेका छन् ।
प्राधिकरण सञ्चालक समितिमा उपभोक्तातर्फ पहिलोपटक दलित समुदायको प्रतिनिधित्व गर्दै बसेलको प्रवेश भएको छ ।
यसैगरी, मन्त्री श्रेष्ठको अध्यक्षतामा बुधबार नै बसेको प्राधिकरण सञ्चालक समितिको १०३०औँ बैठकले निमित्त कार्यकारी निर्देशक दीर्घायूकुमार श्रेष्ठलाई कायममुकायम कार्यकारी निर्देशकको जिम्मेवारी दिने निर्णय गरेको छ । काठमाडौं महानगरपालिका–१२ निवासी श्रेष्ठले विगत २९ वर्षदेखि प्राधिकरणको प्राविधिक तथा व्यवस्थापकीय जिम्मेवारी सम्हाल्दै आएका छन् । उनले २०५४ सालमा सातौँ तहको अधिकृतका रूपमा सेवा प्रवेश गरेका थिए ।
इलेक्ट्रिकल इन्जिनियरिङमा स्नातक र इन्फर्मेशन एन्ड कम्युनिकेसन इन्जिनियरिङमा स्नातकोत्तर पूरा गरेका श्रेष्ठलाई ऊर्जा क्षेत्रको व्यवस्थापन, प्रसारण प्रणाली विस्तार र विद्युत् सेवा सुधारका कार्यलाई तीव्रता दिने अपेक्षासहित नयाँ जिम्मेवारी दिइएको छ । नवनियुक्त दुवै सञ्चालक सदस्य र कामु कार्यकारी निर्देशक श्रेष्ठलाई बुधबार नै मन्त्री श्रेष्ठले पद तथा गोपनीयताको शपथ गराए ।
.jpg)
